Bakı, 25 iyul, AZƏRTAC

İcbari Tibbi Sığorta üzrə Dövlət Agentliyi 2022-ci ilin iyun ayında icbari tibbi sığorta çərçivəsində Tibbi Ərazi Bölmələrini İdarəetmə Birliyinin (TƏBİB) tabeliyindəki tibb müəssisələrində vətəndaşlara göstərilən tibbi xidmətlərlə bağlı statistik göstəriciləri təqdim edib.

İcbari Tibbi Sığorta Üzrə Dövlət Agentliyindən AZƏRTAC-a verilən məlumata görə, iyun ayında dövlət tibb müəssisələrinə 813 min 942 şəxs 1 milyon 479 min 929 dəfə müraciət edib. Vətəndaşlara göstərilən tibbi xidmətlərin sayı isə 3 milyon 453 min 419 olub. Tibbi xidmətlərin 84 faizi ambulator, 16 faizi stasionar şəraitdə göstərilib. Pasiyentlərin 29 faizini uşaqlar, 71 faizini isə böyüklər təşkil edib.

Pasiyentlərin müraciəti əsasən ümumi tibbi müayinə, endokrin sistemin xəstəlikləri, qan dövranı sistemi xəstəlikləri, tənəffüs sistemi xəstəlikləri, sümük və əzələ sisteminin və birləşdirici toxumanın xəstəlikləri, həzm sisteminin xəstəlikləri, sidik-cinsiyyət sisteminin xəstəlikləri, göz və gözün əlavə aparatının xəstəlikləri, zədələr və zəhərlənmələr, habelə sinir sistemi xəstəlikləri ilə bağlı olub.

Bu ilin iyun ayında Bakı şəhəri üzrə dövlət tibb müəssisələrinə 320 min 331 şəxs 627 min 393 dəfə müraciət edib. Vətəndaşlara göstərilən tibbi xidmətlərin sayı isə 1 milyon 467 min 741 olub. Beləliklə, ölkə üzrə qeydə alınan ümumi müraciət sayının 42 faizi və göstərilən tibbi xidmətlərin 43 faizi Bakı şəhərinin payına düşüb.

Ən çox tibbi xidmət göstərmiş tibb müəssisələrinin ilk onluğunu Bakı Baş Səhiyyə Mərkəzi, Nərimanov Tibb Mərkəzi, Kliniki Tibb Mərkəz, Akademik M.Ə.Mirqasımov adına Respublika Klinik Xəstəxanası, Sabunçu Tibb Mərkəzi, K.Y.Fərəcova adına Elmi-Tədqiqat Pediatriya İnstitutu, Binəqədi Tibb Mərkəzi, Akademik C.M.Abdullayev adına Elmi-Tədqiqat Kardiologiya İnstitutu, Xəzər Tibb Mərkəzi və Mərkəzi Neftçilər Xəstəxanası daxildir.

Cari ilin iyun ayında Bakı şəhəri istisna olmaqla, 63 şəhər və rayon üzrə dövlət tibb müəssisələrinə 509 min 997 şəxs 852 min 536 dəfə müraciət edib. Vətəndaşlara göstərilən tibbi xidmətlərin sayı isə 1 milyon 985 min 678 olub. Beləliklə, ölkə üzrə qeydə alınan ümumi müraciət sayının 58 faizi və göstərilən tibbi xidmətlərin 57 faizi regionların payına düşüb.

Ən çox tibbi xidmət göstərmiş tibb müəssisələrinin ilk onluğunu Sumqayıt Tibb Mərkəzi, Gəncə Şəhər Birləşmiş Xəstəxanası, Mingəçevir Şəhər Mərkəzi Xəstəxanası, Bərdə, Abşeron, Yevlax, Balakən, Quba, Xaçmaz və Ağdaş rayon mərkəzi xəstəxanaları daxildir.

2022-ci ilin yanvar-may ayları ərzində TƏBİB-in tabeliyindəki dövlət tibb müəssisələrində aparılması mümkün olmayan əməliyyat və xidmətlərlə bağlı özəl tibb müəssisələrinə göndəriş əldə edən vətəndaşlar 22 min 168 tibbi xidmətdən yararlanıb. Bu xidmətlərdən 485-i uşaqlara, 21 min 683-ü isə böyüklərə göstərilib.

Sözügedən tibbi xidmətlərdən 7 min 156-nı oftalmoloji əməliyyatlar, 6 min 306-nı invaziv radiologiya xidmətləri, 5 min 236-nı ürək-damar cərrahiyyəsi, 959-nu urologiya, 922-ni neyrocərrahiyyə, 278-ni travmatologiya, 221-ni ümumi cərrahiyyə, 131-ni LOR, 54-ni isə ginekologiya və doğuş üzrə aparılan əməliyyatlar təşkil edib. Digər sahələr üzrə icra olunan əməliyyatların sayı isə 283-dür. İcra olunan koxlear implantasiya və endoprotezləşdirmə əməliyyatlarının sayı isə müvafiq olaraq 65 və 557 olub.

Vətəndaşlara verilmiş göndərişlər əsasında müqaviləli tibb müəssisələri tərəfindən tibbi xidmətlərin göstərilməsi və onların elektron reyestrdə qeydiyyatı cari ilin yanvar-may ayları üzrə davam edir. Xatırladaq ki, hazırda agentliyin müqavilə bağladığı özəl tibb müəssisələrinin sayı 69-a çatır və bu say mütəmadi olaraq yenilənir.