Kabil aeroportu bütün reysləri dayandırıb
Bakı, 16 avqust, AZƏRTAC
Həmid Kərzai adına Kabil aeroportu sərnişin təyyarələrinin yola salınmasını və qəbul edilməsini dayandırdığını elan edib.
AZƏRTAC Əfqanıstan KİV-lərinə istinadla xəbər verir ki, aeroport administrasiyası “qarətlərin və iğtişaşların qarşısını almaq üçün” sərnişinləri hava limanına gəlməməyə çağırıb.
“BBC News” telekanalı ABŞ hərbçilərinin amerikalıların təxliyəsini həyata keçirmək üçün aeroportu və uçuşların idarəsini nəzarətə götürdüyü barədə məlumat yayıb. ABŞ səfirliyinin bütün personalı aeroporta gətirilib.
Qeyd edək ki, avqustun 15-də amerikalı hərbçilər beynəlxalq Kabil aeroportunun kommersiya reyslərini qəbul etmədiyini bildirib. Həmin gün “Taliban” hərəkatının nəzarəti altında yaşamaq istəməyərək ölkəni tərk etməyə çalışan minlərlə insan Kabil hava limanına gəlib.
Bölmənin digər xəbərləri
