KAİNATDA GÜNƏŞ SİSTEMİNƏ BƏNZƏR YENİ PLANET SİSTEMİ AŞKAR EDİLMİŞDİR
AZƏRTAC Bi-Bi-Si-yə istinadla xəbər verir ki, astronom Martin Dominik başda olmaqla, Şotlandiyanın Sent-Endryus universitetinin bir qrup alimi strukturuna və yaranma formalarına görə Günəş sisteminə bənzər yeni planet sistemi aşkar etmişlər.
M.Dominik Kral Astronomiya Cəmiyyətinin Belfastda təşkil etdiyi Kainatın öyrənilməsinə dair ekspertlərin görüşündə öz layihəsini təqdim edərkən demişdir: “Biz iki planetli sistem aşkar etmişik. Bu planetlər Günəş sistemində Yupiter və Saturnun yerinə yetirdikləri rolu oynayırlar. Həmin planetlərin oxşar nisbi kütləsi, orbitlərinin təxminən eyni radiusu və oxşar orbital dövrü vardır”.
Yeni aşkar edilmiş planetlərin ətrafında fırlandıqları ulduz Günəşin tam analoqu deyil, çünki kütləsi təqribən iki dəfə azdır.
Günəş sistemindən yığcam olan yeni sistem bizdən 5 min işıq ili uzaqda yerləşir.
M.Dominikin fikrincə, bu kəşf göstərir ki, Günəş sistemi Kainatda yeganə deyildir. Deməli Kainatda Yer kürəsinə bənzər planetlər də mövcud ola bilər.
Bölmənin digər xəbərləri
