KANADA UNİVERSİTETLƏRİ TƏMSİLÇİLƏRİNİN AZƏRBAYCANA SƏFƏRİ PLANLAŞDIRILIR
Kanada-Azərbaycan Əməkdaşlıq Assosiasiyasından AZƏRTAC-a daxil olan məlumatda bildirilir ki, Assosiasiyanın Azərbaycanda təhsilin inkişafı ilə bağlı növbəti layihəsi Kanada Beynəlxalq İnkişaf Agentliyinin maliyyələşdirdiyi və Kanada Universitetləri və Kollecləri Assosiasiyası tərəfindən həyata keçirilən “Gələcək naminə əməkdaşlıq” proqramı çərçivəsində qəbul olunmuşdur. Layihədə Kanadanın Waterloo və Brok universitetlərinin professorları və inzibati işçilərindən bir qrupunun Azərbaycana səfəri planlaşdırılır. Səfər zamanı Azərbaycanın bir sıra təhsil müəssisələrində kredit təhsil sisteminə keçid, Kanada kredit təhsil sistemi, Waterloo universitetində akademik xidmətin və tələbə registrasiya departamentinin iş üslubu barədə məlumat veriləcəkdir.
Səfər zamanı Azərbaycanın müvafiq universitetləri ilə dünyanın ən qabaqcıl ali təhsil müəssisələrindən sayılan Waterloo universiteti arasında informasiya texnologiyaları sahəsində bakalavr və magistr dərəcəli mütəxəssislərin birgə hazırlanması planı da müzakirə olunacaqdır.
Bölmənin digər xəbərləri
