“KATV1” “Köhnə qiymətə daha çox internet” kampaniyasına başlayıb
Bakı,18 yanvar, AZƏRTAC
“KATV1” kabel operatoru və internet provayderi “Köhnə qiymətə daha çox internet” adlı yeni kampaniyaya başlayıb.
Şirkətdən AZƏRTAC-a bildirilib ki, sentyabrın 15-dək davam edəcək kampaniya çərçivəsində ev və ofislərə “Ethernet” texnologiyası ilə yüksək sürətli internet təklif edilir. Kampaniya müddətində gecə saat 00:00-dan səhər saat 12:00-dək yüksək buraxılış qabiliyyətinə və zəmanətli bağlantı keyfiyyətinə malik fərdi rabitə kanalları ilə təqdim olunan sürət iki dəfə artırılacaq. Məsələn, 8 meqabit saniyəlik (Mbit/s) internetdən istifadə edənlər göstərilən vaxt aralığında 16 Mbit/s-lik internet ilə təmin olunacaqlar.
Yeni texnologiyalar və şəbəkənin miqyası çevik qiymət həllərini, həmçinin həddən artıq yüklənmə zamanı və günün istənilən vaxtı sabit sürəti, fasiləsiz, kəsintisiz və itkisiz bağlantını təklif etməyə imkan verir.
Eyni zamanda “KATV1” şirkəti əvvəlki “İnternet+TV” kampaniyasının başa çatdığını bildirir. Bundan sonra bu kampaniyaya qoşulmuş abunəçilər TV və internet üçün əvvəlki qiymətlər üzrə -əsas telekanallar paketi üçün 10 manat, 8 Mbit/s-lik internet üçün isə 18 manat ödəniş edəcəklər.
Bölmənin digər xəbərləri
