Kəngərli rayonunda Heydər Əliyevin siyasi irsinin təbliği diqqət mərkəzində saxlanılır
Kəngərli, 25 aprel, AZƏRTAC
Sürətlə inkişaf edən Naxçıvan Muxtar Respublikasında bu gün əldə olunan nailiyyətlər ulu öndər Heydər Əliyevin siyasi xəttinin və ideyalarının uğurla davam etdirilməsinin bariz ifadəsidir.
AZƏRTAC-ın Naxçıvan bürosu xəbər verir ki, bu fikir Yeni Azərbaycan Partiyası Kəngərli rayon təşkilatında keçirilən şura iclasında səsləndirilib. İclasda 2018-ci ilin ilk rübünün yekunları müzakirə edilib, qarşıda duran vəzifələrdən söhbət açılıb.
Tədbirdə təşkilatın sədri, Naxçıvan Muxtar Respublikası Ali Məclisinin deputatı Sevda Quliyeva çıxış edərək bildirib ki, bu il aprelin 11-də keçirilən növbəti prezident seçkilərində xalqımız bir daha tarixi seçim edərək sabitliyə, inkişafa, sosial-iqtisadi və mədəni-mənəvi tərəqqiyə, demokratik dəyərlərə səs verdi, İlham Əliyevə sarsılmaz etimad göstərdiyini bir daha nümayiş etdirdi.
Təşkilat sədri vurğulayıb ki, hərtərəfli inkişaf edən respublikamız və onun ayrılmaz tərkib hissəsi olan qədim diyarımız Heydər Əliyev ideyalarının işığında özünün yüksəliş mərhələsini yaşayır. İnkişaf və tərəqqiyə qovuşan Kəngərli rayonu da həyata keçirilən quruculuq tədbirləri nəticəsində başdan-başa abadlaşıb, infrastruktur ən müasir səviyyədə yenidən qurulub.
“Yeni Azərbaycan Partiyası Kəngərli rayon təşkilatının 31 ərazi ilk partiya təşkilatında birləşən 3 min 68 partiya üzvündən 1221-i, yəni 39 faizi qadınlardan, 972-si, yəni 31 faizi isə gənclərdən ibarətdir. 2018-ci ilin ilk rübündə Yeni Azərbaycan Partiyası sıralarına 41 üzv qəbul edilib, bunlardan 29-u qadın, 28 nəfəri isə gənclərdir”, - deyən Sevda Quliyeva qeyd edib ki, partiyanın rayon təşkilatı öz fəaliyyətini ilin əvvəlindən müəyyən olunmuş iş planına və Yeni Azərbaycan Partiyası Naxçıvan Muxtar Respublika Təşkilatı Siyasi Şurasının 2017-ci il 16 mart tarixli iclasının tələbləri səviyyəsində qurub. Vaxtında keçirilən partiya yığıncaqlarında görülən işlərin hesabatı dinlənilib, işin keyfiyyətinin artırılması üçün məqsədyönlü tədbirlər həyata keçirilib. Ərazi ilk partiya təşkilatlarının fəaliyyətinə nəzarət artırılıb, onlara metodik kömək göstərilib. Bununla yanaşı, Yeni Azərbaycan Partiyası sıralarına qəbul olunan partiya üzvlərinin siyasi-ideoloji hazırlığı diqqət mərkəzində saxlanılıb, keyfiyyət amilinə üstünlük verilib. 2018-ci ilin I rübündə təşkilatın 1 şura, 3 idarə heyəti yığıncağı keçirilib.
Diqqətə çatdırılıb ki, bu il Azərbaycan xalqının ümummilli lideri Heydər Əliyevin anadan olmasının 95-ci ildönümü qeyd edilir. Bu məqsədlə rayon ərazisində ulu öndər Heydər Əliyevin siyasi irsinin gənclərə öyrədilməsi məqsədilə müvafiq tədbirlər keçirilməli, ərazi ilk partiya təşkilatları fəallıq göstərməlidirlər.
Tədbirdə Yeni Azərbaycan Partiyası Kəngərli rayon təşkilatı Qadınlar Şurasının sədri Xəzəngül Orucova, təşkilatın Gənclər Birliyinin sədri Süleyman Süleymanov, Qıvraq qəsəbə ərazi ilk partiya təşkilatının sədr müavini Vüsalə Musayeva, rayon Elektrik Şəbəkəsi ilk partiya təşkilatının sədri Elmar Səfərov çıxış ediblər.
Şura iclasında müzakirəyə çıxarılan məsələ ilə əlaqədar qərar qəbul olunub.
Bölmənin digər xəbərləri
