Keratindən istifadə edərkən bir sıra qaydalar gözlənilməlidir
Bakı, 11 noyabr, AZƏRTAC
Son vaxtlar xanımlar saç düzmü zamanı keratindən çox istifadə edirlər. Keratin saçın vəziyyətinə faydalı təsir göstərir, onu bərpa edir, strukturunu yaxşılaşdırır. Prosedurun köməyilə saçlar cəlbedici görünüş əldə edir və parlaq olur.
Keratin xüsusilə çox qabaran, elektriklənən və sözə baxmayan saçlar üçün nəzərdə tutulub. Son vaxtlar həmin kimyəvi maddədən daha çox, necə deyərlər, sorğu-sualsız istifadə edirlər. Lakin ondan istifadə edilməsinin öz qaydaları var.
AZƏRTAC xəbər verir ki, bununla bağlı stilist Rəşad Rəhimov deyib: “Tərkibində formalid olan və formalidsiz keratinlər var. Salonların çoxunda tərkibində 9-12 faiz formalid olan keratinlərdən istifadə edilir. Onun sağlamlığa böyük ziyanı var. Bəzi xanımlar keratinlə keratin-botoksu dəyişik salır. Keratin düzləşdirici, keratin-botoks isə həm düzləşdirici, həm də bərpaedicidir. Təbii saçlar üçün keratin, boyalı saçlar üçün isə keratin-botoksdan istifadə etmək məsləhətlidir”.
Saçlarını keratinlə düzləşdirmək istəyən xanımlar diqqətli olmalıdırlar. Əks halda saçları zədələnə və ya tam olaraq yana bilər.
Bölmənin digər xəbərləri
