KEŞLƏ QƏSƏBƏSİNDƏ SANİTARİYA TƏDBİRLƏRİ DAVAM ETDİRİLİR
Keşlə qəsəbəsi ərazisində kanalizasiya sistemində baş vermiş qəzanın sanitar-epidemioloji fəsadlarının qarşısını almaq üçün bütün vacib tədbirlərin həyata keçirilməsi təmin edilmişdir.
Respublika Gigiyena və Epidemiologiya Mərkəzindən AZƏRTAC-a bildirmişlər ki, bu məqsədlə təşkil edilmiş həkim briqadaları əhali arasında geniş sanitar maarifləndirmə işləri aparmış, sakinlərə sudan istifadə və gigiyenik qaydalar barədə məlumat vermişlər.
Eyni zamanda qəza baş verən ərazidən keçən içməli su xətlərinin çirklənməsi ehtimalı olduğuna görə kəmərlər ciddi nəzarətə götürülmüş, su nümunələri gündəlik laboratoriya müayinələrinə cəlb edilmişdir. Müayinələr zamanı bir neçə quyunun mikrobioloji cəhətdən çirkləndiyi məlum olmuş, həmin mənbələrin zərərsizləşdirilməsi tədbirləri həyata keçirilmişdir.
Qəza baş vermiş ərazidə, habelə kanalizasiya suları ilə çirklənmiş həyətlərdə və evlərdə əsaslı dezinfeksiya işləri aparılmışdır.
Sanitariya tədbirləri davam etdirilir.
Bölmənin digər xəbərləri
