KOMPYUTERLƏŞDİRMƏ HASİLATIN ARTMASINA XİDMƏT EDİR

28.04.2006 [12:39]
Çap et
A⁺ A^-

Dövlət Neft Şirkətindən AZƏRTAC-a bildirmişlər ki, şirkətin bütün strukturlarında kompyuterləşdirməyə, istehsal proseslərinə avtomatik nəzarətə və idarəetmə sistemlərinin qurulmasına böyük diqqət yetirilir. Bu məqsədlə vaxtilə ”Azneft” İB-də fəaliyyət göstərən nəzarət-ölçü cihazları və avtomatlaşdırma şöbəsinin işi bərpa edilmişdir. Düzgün və operativ məlumat əldə etmək, əməyin təhlükəsizliyinə şərait yaratmaq, qəza vəziyyətində olan avadanlığı avtomatik söndürmək, yanğın və partlayışların qarşısını almaq üçün böyük obyektlərin hamısı kompyuter və mikroprosessorla təchiz edilməkdədir. Avtomatika və kompyuter proqramları quyuların işə salınmasına və sabit neft hasilatı üçün tələb edilən qazın həcmini dəqiq müəyyənləşdirməyə də imkan verir.

İlyarım əvvəl “Qum adası” NQÇİ-də istehsal prosseslərinə avtomatik nəzarət və idarəetmə sistemi ilə təchiz olunmuş kompressor stansiyasının birinci növbəsi işə salınmış, nəticədə “Bahar” yatağında məhsuldarlıq artmışdır. Yaxın vaxtlarda istismarda olmayan qazlift quyularını yüksək təzyiqli qazla təmin etmək üçün “Qum adası” NQÇİ-də 1 nömrəli kompressor stansiyası işə salınacaqdır. Hazırda “Azneft” İB-də 6 böyük kompressor stansiyası avtomatik nəzarət və idarəetmə sistemi ilə təchiz olunmuşdur. Bunlardan ikisi “Neft daşları”, ikisi “Nərimanovneft”, ikisi də ''Qum adası'' NQÇİ-dədir. Bunlardan başqa, “Günəşli” yatağındakı 10 dərinsulu platformada avtomatlaşdırılmış qazpaylayıcı sistemlər quraşdırılmışdır. Bu istiqamətdə işlər yaxın illərdə də davam etdiriləcəkdir.

Avtomatlaşdırılmış idarəetmə sistemləri layihələri Sumqayıtdakı “Neftqazavtomat” Elm-İstehsalat Birliyi tərəfindən işlənilir. Keçmiş SSRİ-də neft və qaz sənayesinin avtomatlaşdırılması üzrə ən böyük müəssisə sayılan “Neftqazavtomat” EİB hazırda da bu qəbildən olan avadanlığın Rusiya və MDB ölkələrinə ixracı üzrə liderliyini qoruyur.

KOMPYUTERLƏŞDİRMƏ HASİLATIN ARTMASINA XİDMƏT EDİR

MÜƏLLİFLƏ ƏLAQƏ

Bölmənin digər xəbərləri