Konqo küçələrində səfalətə məhkum edilmiş uşaqlar
Bakı, 14 may, AZƏRTAC
Konqonun paytaxtı Kinşasada 30 minə yaxın uşaq yoxsulluq içində yaşayır, ailələri tərəfindən tərk edilmiş bu azyaşlılar döyülmə və sektaların qurbanına çevriliblər. Bir çoxları “kuluna” - oğurluq edən, öldürən və zorlayan dəstələrin üzvləri olur, çünki onlar bu əməlləri həyatda qalmaq üçün öyrəniblər.
AZƏRTAC xəbər verir ki, ordunun M-23 partizan dəstəsinə qarşı döyüşdüyü Konqo Demokratik Respublikasının (KDR) şərqində baş verən silahlı münaqişə küçələrdə yaşayan sahibsiz uşaqların sayının artmasına səbəb olub. İspaniyanın ABC qəzeti xəbər verir ki, onların bir çoxunun həyatı qaçqın düşərgələrində başlayıb və 20 milyona yaxın əhalisi olan paytaxt Kinşasa kimi böyük şəhərlərdə başa çatıb.
Yetərincə real rəqəm olmayan bəzi hesablamalara görə, 30 mindən çox uşaq Kinşasa küçələrində, on minlərlə isə şəhərin digər yerlərində yaşayır. “InteRed” qeyri-hökumət təşkilatının məlumatına görə, onların demək olar ki, 70 faizi 12-18 yaş arasındadır, 26-48 faizi isə qızlardır. Bu azyaşlıların küçələrə çıxmasının səbəbləri zorakılıqdan (65 faiz) dostların təsirinə (45 faiz), yoxsulluqdan (44 faiz) cadugərlik ittihamlarına (41 faiz) qədər müxtəlifdir.
Daha bir mühüm statistika isə Dünya Bankının məlumatıdır. Burada bildirilir ki, keçən il Konqoda gənclər arasında işsizlik səviyyəsi 42 faizə çatıb. Əhalinin 50,83 faizini 15-64 yaş arasında olanlar təşkil edir. Ölkədə gözlənilən ömür uzunluğu nisbətən aşağıdır - təxminən 59 il. Xüsusən qızların təhsilə çıxışı problemdir.
Kinşasada ölkənin ən böyük uşaq evi olan Mama Kokoda 400-dən çox uşaq var. Onların bir çoxunun ciddi əlilliyi var, damğalanıb (fərd və ya qrup insana müəyyən psixoloji, fiziki, intellektual və ya digər xüsusiyyətlərə görə mənfi münasibətin formalaşması) və son nəticədə ailələri tərəfindən tərk edilib. Şöbələrin birində köhnə dəmir çarpayılarda bir-iki yaşlı uşaqlar, hətta xəstə körpələr də var.
Bu gün həmin azyaşlıların əksəriyyəti Konqo Demokratik Respublikasında “kuluna” kimi tanınan uşaqlara çevrilir. Yəni, bu uşaqlar kriminal dəstənin üzvü olur, onlar zorlayır, öldürür, hədələyir və oğurlayırlar, çünki bunu çox vaxt keçirdikləri küçələrdə, körpülərdə, tunellərdə və bazarlarda öyrəniblər.
Bütün bunlara sektaların yayılması və əhalinin cadugərliyə inanması da əlavə olunur ki, buna görə də bəzi ailələrdə müəyyən problemlərin övladlardan birindən qaynaqlanması qənaəti hasil olur və nəticədə uşaq evdən qovulur.
“Karibu” assosiasiyasının icraçı direktoru və konqolu insan haqları müdafiəçisi Nikolas Ndonqala görə, Konqo küçələrində yaşayan minlərlə uşağın dəhşətli reallığı ölkənin yaşadığı dərin humanitar böhranı əks etdirir. Əksəriyyəti yetim və ya dağılmış ailələrdən olan bu uşaqlar onların gündəlik həyatının bir hissəsinə çevrilmiş zorakılıq, qəddarlıq, pul müqabilində seks və istismar şəraitində yaşamağa məcburdurlar.
Bölmənin digər xəbərləri
