CƏMİYYƏT
“Könüllülər ilində” DOST könüllülərinin fəaliyyəti daha da genişlənəcək
Bakı, 30 yanvar, AZƏRTAC
Ötən il aprelin 12-də DOST Agentliyində könüllülük fəaliyyətinə başlanılıb. Könüllülər əsasən DOST mərkəzlərinə müraciət edən vətəndaşların müvafiq xidmət pəncərələrinə yönləndirilməsi, mərkəzə üz tutan sakinlərin növbələrinin tənzimlənməsi, onların arasında rəy sorğularının keçirilməsi, sağlamlıq imkanları məhdud və əlilliyi olan şəxslərə, yaşlılara xüsusi kömək göstərilməsi, müxtəlif anket forma və ərizələrin doldurulmasına yardım göstərilməsi, elektron xidmətlərdən istifadə edilməsi məsələləri ilə məşğul olurlar. DOST Agentliyinin Könüllülərlə iş şöbəsinin müdiri Ruslan Mirzəliyev könüllülük proqramları ilə bağlı AZƏRTAC-ın suallarını cavablandırıb. Müsahibəni oxucularımıza təqdim edirik.
- “DOST” Mərkəzi bir ildən az müddətdir ki fəaliyyət göstərir. Lakin bu qısa müddətdə “DOST” Mərkəzində bir neçə könüllülük proqramı həyata keçirilir. Bu proqramlar barədə məlumat vermənizi xahiş edirik.
- Həyata keçirilən proqramlardan biri “Gənc DOST” altproqramıdır. Bu proqram 16 yaşından 29 yaşınadək olan gənclərin, o cümlədən əlilliyi olan şəxslərin vətəndaşlara xidmət sahəsində təcrübə qazanması, işgüzar vərdişlər əldə etməsi, fərdi inkişafı və karyera yolunda ilk uğurlu addımlarının təməlinin qoyulması məqsədi daşıyır. Həmin altproqram üzrə indiyədək 8500-dən çox gənc müraciət edib, onlardan 900 nəfərlə aparılan müsahibədən sonra 241 nəfər könüllü fəaliyyətə cəlb olunub. Könüllülərin iki aylıq fəaliyyəti qiymətləndirilərək onlara müxtəlif dərəcəli sertifikatlar təqdim olunur, fəaliyyəti yüksək qiymətləndirilən şəxslər üçün gələcəkdə DOST Agentliyi və DOST mərkəzlərində karyera qurmaq imkanı yaradılır. İndiyədək onlardan 17 nəfər işə qəbul edilib.
Digər proqram “Gümüşü DOST” altproqramı pensiyaçıların cəmiyyətə reinteqrasiyası, nəsillərarası təcrübə və bilik mübadiləsi, yaşlı şəxslərin asudə vaxtının aktiv təşkili və fəal yaşlanması məqsədi daşıyır. Ötən müddət ərzində könüllülük fəaliyyəti üçün müraciət edən 250 pensiyaçıdan 22 nəfər həmin fəaliyyətə cəlb olunub.
“Virtual DOST” altproqramı çərçivəsində isə təhsil, təlim, tədqiqat, PR, konsaltinq və s. sahələr üzrə verilən tapşırıqların onlayn qaydada könüllülər tərəfindən yerinə yetirilməsi nəzərdə tutulur. Həmin altproqram əsasında müvafiq sahələr üzrə peşəkar mütəxəssislər, ictimai xadimlər, habelə əlilliyi olan şəxslər kompüter, planşet və ya smartfondan istifadə etməklə ofis və evlərində könüllü kimi fəaliyyət göstərmək imkanına malik olur, müxtəlif mikrolayihələr həyata keçirirlər. İlk olaraq “Məlumatlı ol” mikrolayihəsi təqdim olunub və onun icrası üçün 28 nəfər müraciət edib.
-Ruslan müəllim, ötən müddətdə könüllülər hansı layihə və tədbirlərdə iştirak ediblər?
-Ötən il könüllülər ən müxtəlif layihə və tədbirlərdə iştirak ediblər. Məsələn, iyulun 30-da Beynəlxalq Dostluq gününə həsr olunmuş “Xalqlar DOSTluğu” layihəsi çərçivəsində 7 müxtəlif ölkəni təmsil edən gənclər həmyaşıdlarını öz ölkələrinin mədəniyyəti, tarixi və adət-ənənələri barədə məlumatlandırıblar. Bununla bərabər könüllülər mədəniyyətlərarası dialoq, xalqların inteqrasiyası kimi məsələlərdə bilavasitə iştirak edərək ölkəmizi layiqincə təmsil ediblər.
Avqustda Daun Sindromlu Şəxslərin Reabilitasiya Mərkəzindən dəvət olunan gənclər 1 saylı DOST Mərkəzində bir günlük "Könüllü DOST" komandasına qoşulub və vətəndaşların qarşılanması, onlara növbə verilməsi, xidmət pəncərəsinə yönləndirilməsi, müxtəlif ərizələrin yazılması və məmnuniyyət sorğularının keçirilməsi ilə əlaqədar baza bacarıqları öyrədiblər. Bundan sonra Daun sindromlu gənclər müstəqil olaraq özləri vətəndaşlara müəyyən sahələrdə xidmət göstəriblər.
Ondan bir ay sonra 1 saylı Bakı DOST Mərkəzinin fəaliyyətə başlamasının 100 günlüyünə həsr olunmuş “DOST kuboku” adlı “Nə? Harada? Nə zaman?” intellektual oyunu üzrə turnir keçirilib və turnirin təşkilati məsələlərinə 25 nəfər könüllü cəlb olunub. Həmin tədbir dövlət orqanları, publik hüquqi şəxslər və digər qurumların əməkdaşları, müxtəlif təşkilatların könüllüləri, pensiyaçılar, jurnalistlər, eləcə də əlilliyi olan şəxslərdən ibarət olmaqla 350 nəfərin iştirakı ilə 4 kateqoriyada dəyərləndirilib.
Ötən ilin payızında Ümumdünya Turizm Günü çərçivəsində DOST könüllülərinin iştirakı ilə Bakıda orta əsrlərin abidəsi olan Qala, Mərdəkan, Ramanı qalalarına ekskursiya təşkil edilib. Beynəlxalq Kulinariya Gününə həsr olunmuş “İnklüziv kulinarlar” layihəsi çərçivəsində “Birgə və Sağlam” İctimai Birliyinin nəzdində yaradılan və autizm sindromlu gənclərin çalışdığı “KaşalataKafe”nin heyəti ilə 1 saylı DOST Mərkəzinin yeməkxanasında tədbir keçirilib. Tədbir zamanı autizm sindromlu gənclərlə “Könüllü DOST” proqramı çərçivəsində fəaliyyət göstərən könüllülər birlikdə müxtəlif şirniyyatlar hazırlayıb və müxtəlif əyləncəli stolüstü oyunlarda iştirak ediblər.
Ətraf mühitin mühafizəsi və təkrar istehsalını gənclər arasında təbliği məqsədilə keçirilən aksiya çərçivəsində könüllülərin cəlb edilməsi ilə Hövsan qəsəbəsindəki çimərliklərdən biri tullantılardan təmizlənib və tullantılar təkrar istehsal üçün “Təmiz şəhər” ASC-yə təhvil verilib.
Bundan başqa, Beynəlxalq Əlillər Gününə həsr edilmiş “DOSTtalks” tədbiri çərçivəsində əlilliyi olan şəxslərin motivasiya çıxışları, görmə qabiliyyəti məhdud olan uşaqların ifası, “DanceAbility” inklüziv komandasının rəqsi və əlilliyi olan şəxslər tərəfindən hazırlanmış müxtəlif əsərlərin sərgisi keçirilib. “Könüllülük sərhəd tanımır” layihəsi çərçivəsində DOST Agentliyinin könüllüləri uşaq evləri, internat məktəbləri və ahıllar evlərini ziyarət edərək həmin müəssisələrin sakinlərinə dəstək və qayğı göstəriblər, onların iştirakı ilə müxtəlif oyunlar və əyləncəli proqramlar təşkil ediblər.
Ötən ilin dekabrında Beynəlxalq Könüllülər Gününə həsr olunmuş 3 minə yaxın gənci əhatə edən “Azərbaycan Könüllülərinin II Həmrəylik Forumu”, Dünya Azərbaycanlılarının Həmrəylik gününə həsr edilmiş “Həmrəy DOST” layihəsində də “Gənc DOST” altproqramının könüllüləri fəal iştirak ediblər. Bütün bunlarla yanaşı, könüllülər şair və yazıçıların ədəbi və bədii yaradıcılıq gecələrini keçirir, teatr və konsertlərdə, müxtəlif idman tədbirlərində böyük fəallıq göstərirlər.
-“Könüllülər ilində” DOST könüllülərinin fəaliyyət planı nədən ibarətdir?
-“Könüllülər ili” ərzində tək gənclərin deyil, digər yaş kateqoriyalarında olanların da könüllü fəaliyyətə cəlb olunmasına şərait yaradılır. Bununla bağlı artıq sayca dördüncü altproqramı olan “Korporativ DOST” altproqramının elanı verilib və yaxın günlərdə həmin altproqramın icrasına başlanılacaq. Həmçinin il ərzində həm gənclər, həm əlilliyi olan şəxslər, həm də pensiyaçı könüllülərin iştirakı ilə bir sıra tədbirlərin keçirilməsi nəzərdə tutulub.