Kürdəmirdə 5600 tondan çox pambıq yığılıb
Kürdəmir, 12 dekabr, AZƏRTAC
Kürdəmir rayonunun pambıqçıları məhsul yığımını başa çatdırıblar. Sahələrdən 5617 ton “ağ qızıl” toplanıb.
Rayon Dövlət Aqrar İnkişaf Mərkəzindən AZƏRTAC-ın bölgə müxbirinə verilən məlumatda bildirilib ki, cari mövsümdə 1997,5 hektar sahədə çiyid səpilmişdi. Pambıqçılar əkinləri yüksək aqrotexniki qaydada becərərək bol məhsul yetişdirməyə nail olublar. Məhsul yığımına 13 pambıqyığan maşın, 1000 nəfərə yaxın işçi qüvvəsi cəlb edilmişdi. İstehsal olunan “ağ qızıl”ın çoxu - 4588 tonu maşınlarla toplanıb.
Hər il olduğu kimi, bu il də rayonun Kürqırağı ərazilərində, o cümlədən Şilyan, Muradxan, Sor-Sor, Köhünlü ərazi dairələrində daha yüksək məhsuldarlığa nail olunub. Ümumiyyətlə, bu il rayon üzrə orta məhsuldarlıq 28,1 sentner olub ki, bu da ötənilki göstəricidən 5 sentner çoxdur. Kürqırağı ərazilərdə isə məhsuldarlıq 30 sentnerdən çoxdur.
Yığılan məhsul “Kürdəmir P-Aqro” MMC-nin və “Kürdəmir” ASC-nin pambıq qəbulu məntəqəsinə verilib.
Bölmənin digər xəbərləri
