LAÇININ ERMƏNİSTAN SİLAHLI QÜVVƏLƏRİ TƏRƏFİNDƏN İŞĞALINDAN 16 İL ÖTÜR
16 il əvvəl, Azərbaycanın mədəniyyət və musiqi beşiyi Şuşanin süqutundan on gün sonra - 1992-ci il mayın 18-də dağlar qartalı Laçının da qanadı sındırıldı, Ermənistanın silahlı quldur dəstələri Dağlıq Qarabağın bu qapısını ələ keçirdilər.
Laçın Rayon İcra Hakimiyyətinin başçısı Ramiz Cəbrayılov AZƏRTAC-a bildirmişdir ki, zəngin iqtisadi potensiala malik Laçının müdafiəsi zamanı 262 nəfər həlak olmuş, yüzlərlə insan yaralanmış və əlil olmuş, 871 uşaq yetim qalmışdır. 1885 kvadratkilometr sahədə yerləşmiş 1 şəhər, 1 qəsəbə və 125 kənddə müharibəyə qədər 63 min nəfər əhali yaşamışdır. Laçın rayonunun ərazisinin 34877 hektarını nadir ağac növləri ilə zəngin meşələr tuturdu. 30 mindən artıq fərdi tikintilər, 142 inzibati bina, 48 sənaye, 61 kənd təsərrüfatı obyekti, 152 təhsil, 142 səhiyyə, 247 mədəni-maarif müəssisələri və kinoteatr, 4 muzey, 450 ticarət məntəqəsi, 2130 kilometrlik avtomobil yolu, 92 körpü, 1187 kilometrlik su, 2136 kilometrlik elektrik, 10200 kilometrlik radio və telefon, 498 kilometr qaz xətləri, 20 müalicəvi su mənbəyi, mərmər, əhəng, bülöv daşı, qızıl, uran yataqları və s. faydalı qazıntılar ermənilər tərəfindən mənimsənilmiş, əhalinin şəxsi mal-mülkü, həmçinin ictimai təsərrüfatların böyük miqdarda varidatı talan edilmişdir. Ermənistan tərəfindən dağıdılma və talan nəticəsində Laçın rayonuna 7.099.526.500 ABŞ dolları məbləğində ziyan dəymişdir. Rayonumuzun ərazisi tarixi, mədəni, memarlıq və dini abidələrlə zəngin idi. Zeyvə, Cicimli, Kosalar, Mirik, Zabux, Hüsülü, Güləbird, Seyidlər, Pircahan, Malıbəy, Hacılar, Qaragöl, Zəylik, Bozlu və başqa kəndlərimizdə bir çox tarixi abidələr var idi, onların arasında XIV, XVIII əsrlərə aid məscidlər, türbələr və məbədlər çoxluq təşkil edirdi.
Laçın işğal olunmaya bilərdi. Aydın idi ki, Şuşadan sonra növbə Laçınındır. Ancaq bu məsələ ilə məşğul olmaq əvəzinə ölkədə hakimiyyət davası gedirdi. Cəbhə bölgəsində olan batalyonların çoxu paytaxta gətirilmişdi, Xalq Cəbhəsinin liderləri onları dövlət dəyişikliyi prosesinə cəlb etmişdilər. Ali Sovetin qabağı, binanın içi hərbçilərlə dolu idi. Qurumun mayın 18-də keçirilən sessiyasında İsa Qəmbər bu orqana sədr seçildi, prezidentin səlahiyyətlərini icra edən şəxs oldu. Həmin gün də Laçın işğal edildi. Qısası, ölkə daxilində hakimiyyət uğrunda mübarizə aparan qüvvələrin sayəsində əsrlər boyu ermənilər üçün alınmaz olan Laçını itirdik. İşğalçı Ermənistan Dağlıq Qarabağdakı separatçılarla birbaşa əlaqəsini təmin edə bildi.
Laçınlılar respublikanın 50-dən artıq rayonunda məskunlaşmışlar. Rayon icra hakimiyyəti isə Ağcabədidə, laçınlıların çoxluq təşkil etdiyi “Taxta körpü” adlanan ərazidədir. Ölkə rəhbərliyinin qayğısı sayəsində buradakı obalarda sosial-məişət şəraitinin yaxşılaşdırılması üçün lazımi tədbirlər görülür.
Respublikanın müxtəlif yaşayış məntəqələrində müvəqqəti məskunlaşmış həmyerlilərimizlə müntəzəm görüşməyi özümə borc bilirəm. Bu ilin mart-aprel aylarında Xətai, Binəqədi, Nərimanov, Sabunçu, Əzizbəyov, Abşeron, Yevlax, Kürdəmir, Bərdə, Tərtər, Saatlı, İmişli, Beyləqan rayonlarında, Mingçevir, Naftalan şəhərlərində məskunlaşmış laçınlılarla görüşmüşəm. Görüşlərdə rayonun təhsil, mədəniyyət, səhiyyə və hüquq mühafizə sahələrinin rəhbərləri də iştirak etmişlər. Hər bir görüş mənə gələcək fəaliyyət üçün istiqamət götürməyə imkan verir, həmyerlilərimizdə isə unudulmadıqlarına inamı möhkəmləndirir. Görüşlərin heç birində məcburi köçkünlərin maddi tələbi ilə rastlaşmamışıq. Hamısı yekdilliklə doğma torpağa qayıtmaq istəyini bildirir, dövlət başçımızın ətrafında sıx birləşdiklərini qeyd edirlər. Mənim bəxtim onda gətirib ki, rayonumuzu Milli Məclisdə Sevindik Hətəmov kimi bir ziyalı təmsil edir. Deputatımız ilk gündən mənimlə çiyin-çiyinədir. Qayğıkeşliyi, yanımcıllığı ilə laçınlılar arasında böyük nüfuz qazanıb. Qeyd edim ki, Sevindik müəllim həm də YAP Laçın rayon təşkilatının sədridir. Onun köməyi, rayon fəallarının, əhalinin səmimi münasibəti, inamı mənə Prezidentimizin qarşıya qoyduğu vəzifələri yerinə yetirmək üçün qüvvə verir. Həmyerlilərimizin məskunlaşdıqları rayonların rəhbərlərinə də minnətdarlığımı bildirirəm. Görüşlərdə məcburi köçkünlərin qarşılaşdıqları sosial-məişət problemləri, onların aradan qaldırılması yolları müzakirə edilir. Qaldırılan məsələlərin bir çoxu yerindəcə həll olunur.
Bütün görüşlərimizdə, əlbəttə, qarşıdan gələn prezident seçkiləri barədə də söz açılır, çıxış edənlər ölkə başçısının ötən müddət ərzində yeritdiyi daxili və xarici siyasəti, o cümlədən Ermənistan-Azərbaycan, Dağlıq Qarabağ münaqişəsinin sülh yolu ilə həll olunmasına yönəlmiş səylərini bəyəndiklərini qeyd edirlər. Bu yaxınlarda isə YAP rayon təşkilatının yığıncağında partiyanın sədri, dövlətimizin başçısı İlham Əliyevə bu sözlərlə bitən müraciət qəbul olunmuşdur: “Biz bütün laçınlıların arzu və istəyini ifadə edərək artıq öz seçimimizi etdiyimizi, ulu öndərin siyasi xəttinin layiqli davamçısı olan Prezidentimizin namizədliyini müdafiə etdiyimizi, Sizi dəstəklədiyimizi bildiririk”.
İnanıram ki, münaqişənin həlli ilə bağlı Azərbaycan Prezidenti İlham Əliyevin yeritdiyi məqsədyönlü siyasət öz bəhrəsini verəcək, biz öz yurdumuza qayıdacağıq.
Bu xatirə günündə həmyerlilərimə səbr, doğma torpaqlarımız uğrunda döyüşlərdə qurban getmiş Vətən övladlarına ulu tanrıdan rəhmət diləyirəm.
######
 |
 |
Bölmənin digər xəbərləri
