Lənkəran-Lerik yolunun torpaq sürüşməsi baş vermiş hissəsində nəqliyyatın hərəkəti bərpa olunmuşdur
Lerik, 12 noyabr (AZƏRTAC). Cənub bölgəsinə son günlər yağan aramsız yağışlar Lənkəran-Lerik yolunda yenidən torpaq sürüşməsinə səbəb olmuşdur.
AZƏRTAC xəbər verir ki, hadisə bu gün səhər Lənkəran-Lerik yolunun 18-ci kilometrliyində baş vermişdir. Torpaq sürüşməsi nəticəsində magistral yolda avtomobillərin hərəkətində fasilələr yaranmışdır. Sürüşmə ərazisinə Lerik rayon 43 nömrəli yol-istismar idarəsinin texnikası və canlı qüvvəsi cəlb edilmiş, yolda nəqliyyatın hərəkəti bərpa olunmuşdur. Hazırda sürüşmə zonasında yolun təmizlənməsi işi davam etdirilir.
Qeyd edək ki, bu ərazidə mütəmadi olaraq torpaq sürüşməsi baş verir. Mütəxəssislər uçqunun qarşısını qısa müddət ərzində tam almağın mümkün olmadığını bildirirlər. Bunun üçün ərazidə uzunmüddətli işlərin aparılması vacib hesab olunur.
Yolun istiqamətini dəyişdirmək məqsədi ilə Ekologiya və Təbii Sərvətlər Nazirliyinin, digər qurumların əməkdaşları hadisə yerinə baxış keçirmişlər. Hazırda yolun Təngivan kəndi ərazisindən keçirilməsi istiqamətində iş aparılır.
Bölmənin digər xəbərləri
