Lənkəran sakinləri onların pulsuz tibbi müayinəsinə şərait yaradılmasından çox razıdırlar
Lənkəran, 22 fevral (AZƏRTAC, Bağır Əliyev). Azərbaycan Prezidenti İlham Əliyevin tapşırıq və tövsiyəsinə əsasən fevralın 17-dən başlayaraq ölkə vətəndaşlarının pulsuz tibbi müayinəsi Lənkəran rayonunda da mütəşəkkil qaydada davam edir.
Mərkəzi Rayon Xəstəxanasının baş həkimi Ağabala Kəlbiyev AZƏRTAC-ın müxbirinə bildirmişdir ki, müayinələr şəhərdəki tibb müəssisələrində yüksək ixtisaslı və təcrübəli həkim briqadaları tərəfindən aparılır. Həmçinin 8 həkim briqadası qrafikə uyğun olaraq hər gün rayon mərkəzindən uzaq ərazilərdə sakinlərin tibbi müayinələrini həyata keçirir.
Baş həkimin müavini Taleh Məmmədli qeyd etmişdir ki, müayinələr qrafikə uyğun aparılır. Bununla belə, sakinlər istənilən vaxt müayinələrin keçirildiyi tibb müəssisəsinə gələrək xidmətimizdən istifadə edə bilər. Müayinələr əsasən 7 tibb sahəsi üzrə aparılır. Beş gün ərzində rayonda 3500 nəfərə yaxın sakin tibbi müayinədən keçmişdir. Müəyyən xəstəliklər aşkarlanan 200 sakin müalicə üçün yerli səhiyyə müəssisələrinə, 10 nəfər isə Bakı şəhərindəki tibb ocaqlarına göndərilmişdir. Aşkar olunan xəstəliklər arasında göz və ürək xəstəlikləri çoxluq təşkil edir. Bu xəstəliklərindən əziyyət çəkənlərin bir qrupu Zərifə Əliyeva adına Milli Oftalmologiya Mərkəzində və Elmi-Tədqiqat Kardiologiya İnstitutunda müalicəyə cəlb olunmuşlar.
Lənkəran Rayon Mərkəzi Xəstəxanasında olarkən tibbi müayinədən keçmiş sakinlərin humanitar aksiya ilə bağlı təəssüratlarını öyrəndik.
Nərmin Dadaşova: Lənkəran Dövlət Universitetinin iqtisadiyyat fakültəsində təhsil alıram. Əhalinin pulsuz tibbi müayinələrdən keçirilməsi Prezidentin humanistliyindən, insanlara qayğısından irəli gələn nəcib aksiyadır. Bu, xüsusilə aztəminatlı ailələr üçün əvəzsiz bir xidmətdir. Bütün bunlara görə Prezident İlham Əliyevə minnətdarıq.
Aydın Rəhimov: Mənim 65 yaşım var. Maliyyə sıxıntısı üzündən müayinədən keçməkyə çətinlik çəkirdim. Hazırda xəstəxanada pulsuz tibbi müayinə olunmağıma şərait yaradan Prezident İlham Əliyevə dərin təşəkkürümü bildirirəm. Bir pensiyaçı kimi mənə göstərilən tibbi xidmətdən çox razıyam.
Həqiqət Abdulova: Uzun illər xidmət sahəsində çalışmışam. Hazırda əmək pensiyası alıram. Sağ olsun Prezidentimiz, yaradılan imkandan mən də yararlanıb Lənkəran Mərkəzi Rayon Xəstəxanasında müayinələrdən keçdim. Həkim kollektivinin münasibətindən, müayinə üçün yaradılan şəraitdən çox razıyam. Buna görə dövlətimizin başçısına minnətdarlığımı bildirir, cansağlığı, uzun ömür arzulayıram.
Qeyd edək ki, aksiya müddətində rayonun 100 mindən çox sakininin müayinədən keçirilməsi nəzərdə tutulur.
Bölmənin digər xəbərləri
