LƏNKƏRANDA BAŞ VERMİŞ YOL-NƏQLİYYAT QƏZASINDA DÖRD NƏFƏR ÖLMÜŞDÜR

30.11.2006 [14:27]
Çap et
A⁺ A^-

AZƏRTAC xəbər verir ki, Lənkəran rayonu ərazisində ağır yol-nəqliyyat qəzası baş vermişdir. Ufail Babayevin idarə etdiyi “KamAZ” və Elnur Heydərova məxsus “Mercedes” markalı avtomaşınlar toqquşmuşdur. Nəticədə E.Heydərov və sərnişinləri - Munis Axundov, Cavid Hadıyev, Şahin Abbasov həlak olmuşlar.

Suraxanı rayonunun Ə.Verdiyev küçəsində Mirzəağa Nuriyev ona məxsus “QAZ-24” markalı avtomaşını saxlayıb yerə düşdükdən sonra avtomaşının özbaşına hərəkət etdiyini gördükdə onu saxlamağa cəhd göstərmiş, ancaq maşınla dirəyin arasında sıxılaraq dünyasını dəyişmişdir.

Nobel prospektində Bakı şəhər sakini Salman Süleymanov “VAZ-21099” markalı avtomaşınla Vaqif Hacıyevi vurub öldürmüşdür.

Şəmkir rayonunun ərazisində rayon sakini Fərhad Fərmayıllı sürdüyü “Nissan-Maxima” markalı avtomaşını ağaca vurmuşdur. Xəsarətlə xəstəxanaya yerləşdirilmiş F.Fərmayıllının sərnişini - Şəmkir rayon sakini Vəli Məmmədovun həyatını xilas etmək mümkün olmamışdır.

Hadisələrlə bağlı cinayət işi açılmışdır, təhqiqat aparılır.