LONDONDAKI AZƏRBAYCANLILAR BUDAPEŞT MƏHKƏMƏSİNİN RAMİL SƏFƏROVLA BAĞLI HÖKMÜNƏ ETİRAZLARINI BİLDİRMİŞLƏR

03.05.2006 [16:29]
Çap et
A⁺ A^-

AZƏRTAC xəbər verir ki, mayın 2-də Londonda yaşayan və təhsil alan soydaşlarımız Macarıstanın bu ölkədəki səfirliyi qarşısında Budapeşt məhkəməsinin Azərbaycan Silahlı Qüvvələrinin zabiti Ramil Səfərovla bağlı hökmünə dair etiraz tədbiri keçirmişlər.

Yerli vaxtla saat 12-də başlanan yürüş-mitinq 2 saat davam etmişdir. Dünya Azərbaycanlılarının Əlaqələndirmə Şurasının üzvü, professor Qulamrza Səbri Təbrizi mitinqdə çıxış edərək, Budapeşt məhkəməsinin hökmünün ədalətsiz olduğunu bildirmişdir.

Tədbirdə ermənilərin azərbaycanlılara qarşı həyata keçirdiyi etnik təmizləmə siyasətinə, azərbaycanlılara qarşı zorakılıq və soyqırımı əməllərinə beynəlxalq cinayət məhkəməsində hüquqi qiymət verilməsi, habelə Ramil Səfərovun Azərbaycana ekstradisiya edilməsi tələbləri səslənmişdir.

Aksiya iştirakçıları tələblərini yazılı surətdə Macarıstan səfirliyinə təqdim etmişlər.