LOS-ANCELESDƏ NEFT FONDUNUN TƏQDİMATI OLMUŞDUR
Mayın 1-də Los-Anceles şəhərinin mötəbər “Recensi” klubunda Azərbaycan Dövlət Neft Fondunun fəaliyyətinə həsr edilmiş seminar keçirilmişdir. Fondun icraçı direktoru Şahmar Mövsümov Heydər Əliyevin təşəbbüsü ilə yaradılmış bu təşkilatın tarixi və prinsipləri barədə məlumat vermişdir. Şahmar Mövsümov Fondun maliyyə şəffaflığı sahəsində uğurlarını və ölkəmizin rəhbərliyi tərəfindən Fondun gələcəyinə strateji əhəmiyyət verildiyini xüsusi vurğulamışdır.
Azərbaycanın Los-Ancelesdəki Baş Konsulluğu tərəfindən Los-Anceles Ticarət Palatası ilə birgə təşkil edilmiş seminarda “Şevron” şirkətinin nümayəndəsi Karl Katrell çıxış etmişdir. O, Qərbin neft şirkətlərinin Xəzər regionuna marağı barədə söhbət açmışdır.
Neft Fondunun təqdimatı seminar iştirakçılarının, o cümlədən Kaliforniyanın maliyyə və biznes dairələri nümayəndələrinin, ştatın rəsmi şəxsləri və Los-Anceles konsulluğu üzvlərinin böyük marağına səbəb olmuş, Neft Fonduna Azərbaycanın gələcəyi naminə xidmətlərinə görə xatirə fərmanı təqdim edilmişdir.
Neft Fondunun direktoru səfər çərçivəsində həmçinin Kaliforniyadakı Milken institutu tərəfindən keçirilən illik “Milken Gilobal Conference” konfransında iştirak etmişdir. Xatırladaq ki, Azərbaycan bu nüfuzlu forumda ilk dəfə iştirak etmişdir.
######
Bölmənin digər xəbərləri
