Macarıstan Zakarpatyeni “mədəni şəkildə fəth etmək” niyyətindədir
Budapeşt, 8 iyun, AZƏRTAC
Macarıstanın Zakarpatye məsələləri üzrə naziri İştvan Qreje özünün mikrobloqunda bildirib ki, ölkə hökuməti Ukraynanın bu vilayətində mədəni ekspansiya tədbirləri görülməsini planlaşdırır.
Nazir qeyd edib ki, bu proqram qonşu ölkənin Zakarpatye vilayətində macar mədəniyyətinin dəstəklənməsinə yönəlib. Qreje həmin proqramı açıq-aşkar “macar mədəni ekspansiyası” adlandırıb.
AZƏRTAC xəbər verir ki, bu proqram bir neçə mərhələdən ibarətdir. 2019-cu ilin payızında Bereqovoda mədəni mərkəz yaradılacaq. Buna görə də, ilk növbədə, oradakı Macar Milli Teatrının yenidən qurulması nəzərdə tutulur. Nazirin sözlərinə görə, bundan sonra Zakarpatyedəki bütün mədəniyyət müəssisələrinin dəstəklənməsi üzrə işlər başlanacaq.
Nazirin sözlərinə görə, ikiillik proqram 2020-ci ildə həyata keçirilməyə başlanacaq.
Ukraynada əhalini siyahıyaalma məlumatına görə, 2011-ci ildə Zakarpatye vilayətində 152 min etnik macar yaşayırdı.
Pərvanə Qarayeva
AZƏRTAC-ın xüsusi müxbiri
Budapeşt
Bölmənin digər xəbərləri
