Maliyyə Nazirliyində Xocalı soyqırımı qurbanlarının xatirəsi yad edilib
Bakı, 24 fevral, AZƏRTAC
Fevralın 24-də Maliyyə Nazirliyində Xocalı soyqırımının 25-ci ildönümü ilə əlaqədar anım tədbiri keçirilib.
Nazirlikdən AZƏRTAC-a bildirilib ki, əvvəlcə Xocalı soyqırımı qurbanlarının xatirəsi bir dəqiqəlik sükutla yad edilib.
Çıxış edənlər 25 il əvvəl Xocalıda erməni silahlı dəstələri və onların havadarları tərəfindən dinc əhaliyə qarşı törədilmiş soyqırımından, eləcə də ermənilərin xalqımıza qarşı törətdiyi digər dəhşətli qətliamlardan bəhs edib, bu faciənin erməni millətçiləri tərəfindən azərbaycanlılara qarşı müntəzəm olaraq həyata keçirilən etnik təmizləmə və soyqırımı siyasətinin davamı olduğu qeyd olunub.
Bildirilib ki, hazırda XX əsrin ən böyük faciəsi olan Xocalı soyqırımının dünya ictimaiyyətinə çatdırılması istiqamətində sistemli tədbirlər həyata keçirilir. Heydər Əliyev Fondunun dəstəyi ilə dünyanın bir çox ölkələrində geniş təbliğat-təşviqat işləri aparılır, “Xocalıya ədalət!” kampaniyası çərçivəsində silsilə tədbirlər təşkil olunur.
Tədbirin sonunda Xocalı faciəsindən bəhs edən sənədli film nümayiş etdirilib.
Bölmənin digər xəbərləri
