“McLaren” F1 təqviminin 22 yürüşədək artırılmasına etiraz etmir
Bakı, 26 avqust, AZƏRTAC
“McLaren” komandasının rəhbəri Andreas Zaydl bildirib ki, o, Formula 1 təqviminin 22 yürüşədək artırılmasına etiraz etmir.
AZƏRTAC xəbər verir ki, Zaydl Formula 1 yarışlarının coğrafiyasını genişləndirmək məqsədilə mərhələlərin ildən-ilə növbəli olmasını, lakin onların sayının saxlanılmasını təklif etdiyini xatırladıb.
“GPBlog” saytı “McLaren” komandasının rəhbərinin aşağıdakı sözlərini sitat gətirir: “Bir neçə detallar hələ müzakirə mərhələsindədir, lakin prinsipcə, biz 2020-ci ildə mərhələlərin sayının artırılmasını dəstəkləyirik. Amma başa düşmək lazımdır ki, biz əməkdaşların əlavə yüklənməsi məsələsində daha ehtiyatlı davranmalıyıq. Mən mərhələlərin növbəli olması yolu ilə onların sayının saxlanılması ideyasını dəstəkləmişəm, çünki yeni traslar Formula 1 mərhələsini qəbul etməyə hazır olmalıdır”.
Xatırladaq ki, növbəti mövsümdən yarışların təqvimi Vyetnam və Niderland mərhələlərinin əlavə olunması ilə 22-yə çatacaq.
Bölmənin digər xəbərləri
