CƏMİYYƏT
Medinex 2022 - möhtəşəm yeniliklər, cari tendensiyalar, dünya səhiyyəsinin təcrübələri
Bakı, 5 noyabr, AZƏRTAC
Noyabrın 5-də Bakı Ekspo Mərkəzində Caspian Event Organisers şirkətinin təşkilatçılığı ilə “Medinex” Azərbaycan Beynəlxalq Tibb İnnovasiyaları və “Beauty Azerbaijan” Azərbaycan Beynəlxalq Gözəllik İndustriyası sərgiləri öz işini yekunlaşdırıb. Sərgilərin birləşmiş ekspozisiyası dünyanın 12 ölkəsindən 90-dan çox şirkəti bir araya gətirib.
Caspian Event Organisers şirkətindən AZƏRTAC-a verilən məlumata görə, “Medinex” sərgisi uzun illər ərzində keçirilən BIHE tibb sərgisindən törəyən yeni bir brenddir və səhiyyə sənayesinin mühüm hissəsini təşkil edir. Bu layihə ölkə vətəndaşlarının sağlamlığının qorunmasının, tibbi xidmətin keyfiyyətinin yüksəldilməsinin, səhiyyə sisteminin maddi-texniki bazasının möhkəmləndirilməsinin və peşə hazırlığının təkmilləşdirilməsinin, eləcə də tibb sahəsində innovasiyaların tətbiqinin aktuallığını səmərəli şəkildə nümayiş etdirib.
Azərbaycan Respublikasının səhiyyə naziri Teymur Musayevin qeyd etdiyi kimi, budəfəki tədbir otuz il ərzində həyata keçirilən beynəlxalq layihələrin davamı olan daha bir müsbət hadisədir.
Biz sərgidə yerli tibbin inkişafının mühüm tərkib hissəsi olan müasir informasiya texnologiyaları və tibbi proqramların nümayişini xüsusi olaraq qeyd etmək istərdik. Azərbaycan, Əlcəzair, Belarus, Danimarka, İtaliya, Qazaxıstan, Pakistan, Rusiya, Sloveniya, Türkiyə, Yaponiya, İsveçrə laboratoriya avadanlıqlarını, tibbi avadanlıqları, tibbi məhsulları, təhsil xidmətlərini, əczaçılıq məhsullarını və dərmanları, vitaminləri və pəhriz təyinatlı qida əlavələrini, optika, stomatologiya, ortopediya məhsullarını, təcili tibbi yardım nəqliyyatı vasitələrini, klinikaları və digərlərini sərgilədilər.
Sərgi Xəzər regionunda tibb mütəxəssislərini bir araya gətirən ən böyük tədbirə çevrilib. Təsadüfi deyil ki, sərgi iştirakçıları işgüzar əməkdaşlığın qurulması ilə yanaşı, çoxlu təcrübə və yeni biliklər qazandılar. Sərgi çərçivəsində keçirilməsi nəzərdə tutulan praktiki və elmi tədbirlərin gənc mütəxəssislərin inkişafına və yeni biliklərə yiyələnməsinə xidmət etməsi xüsusilə vacibdir.
“Medinex” sərgisi çərçivəsində tibbin müxtəlif sahələrindən mütəxəssislərin iştirak etdiyi işgüzar proqram həyata keçirilib. “Xəstəliklərin diaqnostikası və müalicəsinə innovativ yanaşma”, “Diaqnostikada yeni nəsil sistemlər və onların klinik üstünlükləri”, “Pediatriyada müasir diaqnostika və müalicə üsulları”, “Tibb sahəsində innovativ texnologiyalar”, “İnnovativ dərman preparatları” mövzularında ekspert qruplarının müzakirələri böyük maraqla qarşılanıb.
Sərginin yüksək vəzifəli qonaqlarının sərgiyə baxışı zamanı yerli tibb sektorunun tanınan nümayəndələri “Medinex” sərgisinin ekspozisiyasını və ictimaiyyətin yeniliklər barədə məlumatlandırılmasında, müasir tendensiyaların öyrənilməsində, müasir səhiyyə nailiyyətlərinin praktiki tətbiqində onun oynadığı rolu yüksək qiymətləndiriblər.