MƏHKƏMƏ DÖVLƏT ƏMLAKININ İDARƏ EDİLMƏSİ ÜZRƏ DÖVLƏT KOMİTƏSİNİN İDDİASINI TƏMİN ETMİŞDİR
Bildirilmişdir ki, bina 1992-ci ildən “Azadlıq” qəzetinin və Azərbaycan Xalq Cəbhəsi Partiyasının istifadəsində olsa da, onlar icarə haqqını ödəməmiş, üstəlik digər orqanların da burada yerləşməsinə şərait yaratmışlar. İclasda qeyd olunmuşdur ki, bina həmin subyektlərin istifadəsinə veriləndə xeyli sayda təhsil işçisi buradan zorla çıxarılmış, hətta 6 müəllim fiziki təzyiqlərə məruz qalaraq bir müddət həbsdə saxlanılmışdır. Bunu o dövrdə binadan zorla çıxarılmış şahid-müəllimlər də təsdiq etmişlər.
Bina 1997-ci ildə Bakı Şəhər İcra Hakimiyyətinin balansından çıxarılaraq Dövlət Əmlakının İdarə Edilməsi üzrə Dövlət Komitəsinin balansına daxil edilmişdir. Həmin vaxtdan isə binada yerləşən qurumlar icarə haqqını ödəməmişlər. Komitənin bu təşkilatlara dəfələrlə müvafiq yer ayrılması ilə bağlı müraciətləri də cavabsız qalmışdır.
Uzun sürən müzakirələrdən sonra məhkəmədə müşavirə keçirilmişdir. Məhkəmə Dövlət Əmlakının İdarə Edilməsi üzrə Dövlət Komitəsinin qeyri-yaşayış sahəsinin boşaldılması barədə qaldırdığı iddia tələbinin təmin olunması barədə qərar çıxarmışdır. Bundan əlavə, Bakı ŞİH başçısının “Azadlıq” qəzetinin redaksiyasının yerləşdirilməsi haqqında 1992-ci il 8 oktyabr tarixili sərəncamı da qüvvədən düşmüş hesab olunmuşdur.
