Meksikada koronavirusa gündəlik yoluxma hallarında rekord qeydə alınıb
Madrid, 13 avqust, AZƏRTAC
Meksikada pandemiyanın üçüncü dalğası rekord vurur.
AZƏRTAC xəbər verir ki, Meksika Səhiyyə Nazirliyi bu cümə axşamı gündəlik 24975 yeni yoluxma hallarının olduğunu bildirib. Bu, pandemiyanın başladığı gündən bu yana ən yüksək göstəricidir. Gündəlik ölüm sayı isə 608 nəfərdir.
Ümumilikdə Meksikada 3,02 milyon insan yoluxub, 246 811 nəfər həyatını itirib. Xəstəxanaların məşğulluq səviyyəsi ölkə üzrə 54 faiz təşkil edir.
Ekspertlərin fikrincə, Meksikada misli görünməmiş yeni yoluxma halları pandemiyanın düzgün idarə edilməməsi, turizm mərkəzlərində və hava limanlarında hökm sürən xaosun əksidir.
İnfeksiyaların sayının artmasına baxmayaraq, Xalq Təhsili Katibliyi 25 milyondan çox şagirdin avqustun 30-da əyani dərslərə qayıdacağını elan edib.
Vaksinasiya kampaniyasında irəliləyiş də yeni yoluxma hallarının qarşısını ala bilməyib. Bu cümə axşamına olan məlumata görə, 52,6 milyondan çox insana ən azı bir doza koronavirus əleyhinə peyvənd vurulub.
Nigar Cəfərli
AZƏRTAC-ın xüsusi müxbiri
Madrid
Bölmənin digər xəbərləri
