Mərkəzi Elmi Kitabxanada müayinə aksiyası
Bakı, 24 fevral, AZƏRTAC
Azərbaycan Milli Elmlər Akademiyasının Mərkəzi Elmi Kitabxanasında (MEK) İİV-lə (İnsanın İmmunçatışmazlığı Virusu) bağlı müayinə aksiyası keçirilib.
MEK-dən AZƏRTAC-a bildiriblər ki, aksiyanın məqsədi İİV infeksiyasına yoluxma hallarının aşkarlanması, virusa yoluxma yolları barədə məlumatlandırma və bu təhlükədən qorunmaqla bağlı maariflənmə işinin aparılmasıdır.
Səhiyyə Nazirliyinin Respublika QİÇS-lə Mübarizə Mərkəzinin həkimlərindən ibarət briqadası kitabxananın işçi heyətini könüllü şəkildə müayinə edib. Müayinə ekspress-test metodu ilə aparılıb. İİV infeksiyası diaqnostikasının ən sadə metodu sayılan bu müayinə zamanı heç bir avadanlıq tətbiq etmədən, barmaqdan qan nümunəsi götürülməklə testin nəticələri 10 dəqiqə müddətində müayinədən keçənlərə bildirilib.
Sonra həkimlər hər bir iştirakçıya fərdi olaraq İİV infeksiyası və ondan qorunma üsulları barədə məsləhətlər veriblər.
İştirakçılara sağlam və təhlükəsiz həyat tərzi normaları barədə bukletlər paylanılıb.
Bölmənin digər xəbərləri
