Bakı, 8 noyabr (AZƏRTAC). Azərbaycan Prezidenti İlham Əliyevin 2006-cı ildə imzaladığı sərəncama əsasən hər il noyabrın 8-i metropoliten işçilərinin peşə bayramı günü kimi qeyd olunur.

AZƏRTAC xəbər verir ki, bu münasibətlə Bakı Metropoliteninin rəisi Tağı Əhmədov başda olmaqla metropoliten kollektivi Fəxri xiyabana gələrək müasir müstəqil Azərbaycan dövlətinin memarı və qurucusu Heydər Əliyevin xatirəsini anmış, ulu öndərin məzarı önünə əklil qoymuşdur.

Görkəmli oftalmoloq alim, akademik Zərifə xanım Əliyevanın da xatirəsi yad olunmuş, məzarı üstünə gül dəstələri düzülmüşdür.

Sonra metropolitençilər Şəhidlər xiyabanında Azərbaycanın müstəqilliyi və ərazi bütövlüyü uğrunda canlarından keçmiş qəhrəman Vətən övladlarının məzarları üzərinə qərənfillər düzmüş, “Əbədi məşəl” abidəsinin önünə əklil qoymuşlar.

Metropolitenin rəisi Tağı Əhmədov jurnalistlərə müsahibəsində Bakı metrosunun son illərdəki inkişafı və perspektivləri barədə məlumat verərək bildirmişdir ki, bu gün stansiyaların sayı 23-ə çatır. 2008-ci ildə büdcə vəsaiti hesabına “Nəsimi”, 2009-cu ildə “Azadlıq prospekti”, 2011-ci ildə isə “Dərnəgül” stansiyaları istifadəyə verilmişdir. Eyni zamanda “İçərişəhər” və “Koroğlu” stansiyaları əsaslı şəkildə bərpa olunmuşdur.

T.Əhmədov demişdir ki, hazırda “28 May” stansiyasında bərpa-abadlıq işləri aparılır və yaxın aylarda bu iş başa çatdırılacaqdır. “Avtovağzal” və “Memar Əcəmi-2” stansiyalarının tikintisi davam etdirilir. Daha sonra bu xəttin davamı olaraq Nəsimi rayonunda “Papanin” kimi tanınan ərazidə şərti adı “B-3” olan stansiya, Heydər Əliyev adına İdman-Konsert Kompleksinin qarşısında “B-4”, Heydər Əliyev Sarayının arxasında “B-5” stansiyaları tikiləcək və bu xətt Dəniz limanına, Keşlə qəsəbəsinə və Suraxanı dairəsinədək uzanacaqdır.

Hazırda “Həzi-Aslanov-2”, “Köhnə Günəşli” və “Yeni Günəşli” stansiyaları arasında da tikinti işləri gedir. Bu stansiyaların tikintisinə dair Fransanın “Buiq” şirkəti və “Akkord” şirkəti ilə müqavilə bağlanmışdır. Həmçinin gələn il Ukraynanın “İnterwood” şirkəti ilə birgə “Xətai-2” stansiyasından “Həzi-Aslanov” stansiyasına qədər olan tuneldə tikinti işlərinə başlanılacaqdır.

Metropolitenin rəisi qeyd etmişdir ki, mövcud xətlərdə qatara yalnız 5 vaqon qoşmaq mümkündür. Tikilməkdə olan yeni stansiyaların platformaları isə qatarın 7 vaqonla hərəkət etməsinə imkan verəcəkdir.

Prezidenti İlham Əliyevin metropoliten qarısında qoyduğu tapşırıq haqqında məlumat verən T.Əhmədov demişdir ki, müvafiq Dövlət Proqramına əsasən 2030-cu ildə Bakı metropolitenində 73 stansiya olacaq, xətlərin uzunluğu isə 119 kilometrə çatdırılacaqdır.