SİYASƏT
MİLLƏTLƏRARASI BƏRABƏRLİK MÖVZUSUNDA KONFRANS
Almati şəhərində ”Qazaxıstan Respublikasında millətlərarası bərabərlik və beynəlxalq normalara hörmətlə yanaşılması siyasi və sosial sabitliyin təminatıdır” adlı beynəlxalq elmi-praktik konfrans keçirilmişdir. Konfransda Qazaxıstan hökumətinin yüksək səviyyəli nümayəndələri, ictimai və mədəni cəmiyyətlərin başçıları, qeyri-hökumət təşkilatlarının rəhbərləri iştirak etmişlər.
Qazaxıstan Ali Məhkəməsinin sədri, Qazaxıstan prezidenti yanında insan hüquqları komissiyasının üzvü Saqitcan Tasmaqambetov, Konfliktologiya mərkəzinin prezidenti Yelena Sadovskaya, Beynəlxalq Miqrasiya Təşkilatının Qazaxıstandakı nümayəndəsi Maykl Çans, BMT İnkişaf Proqramı regional nümayəndəliyinin müşaviri Sergey Sirotkin və başqaları milli azlıqların hüquqlarının qorunması və Qazaxıstanda BMT konvensiyalarının həyata keçirilməsi, insan hüquqlarının qorunmasında və vətəndaş cəmiyyətinin yaradılmasında qeyri-hökumət təşkilatlarının rolu, Qazaxıstanda vətəndaş cəmiyyəti və millətlərarası birliyin işıqlandırılmasında kütləvi informasiya vasitələrinin rolu mövzularında məruzələr etmişlər.
Almatıdakı “Turan” konqresinin sədri Müseyib Novruzov ölkədə milli azlıqlara yaradılmış şərait və millətlərarası bərabərliyin yaradılmasında radio və televiziyanın rolu haqqında danışmışdır.
Qulu Kəngərli
AZƏRTAC-ın xüsusi müxbiri
Almatı