MİLLİ MƏCLİS 2007-Cİ İL ÜÇÜN DÖVLƏT BÜDCƏSİNİ TƏSDİQ ETMİŞDİR
İclasda “Azərbaycan Respublikasının 2007-ci il üçün dövlət büdcəsi haqqında” qanun layihəsi təsdiq edilmişdir. Maliyyə naziri Samir Şərifov qanun layihəsinin müzakirəsi zamanı deputatların təklif və tövsiyələri, habelə qaldırılan məsələlərlə bağlı layihədə edilən dəyişikliklərdən danışmışdır. Nazir bildirmişdir ki, müzakirələr zamanı qaldırılan məsələlər hökumət tərəfindən öyrənilmiş və dövlət büdcəsinin ehtiyat fondundan 64,5 milyon manat vəsait ixtisar edilərək bir sıra məsələlərin həllinə yönəldilmişdir.
S.Şərifov vurğulamışdır ki, gələn ilin büdcəsi daha çox sosialyönümlü olacaqdır. Bu xərclərin büdcədəki xüsusi çəkisi 37,9 faiz artmışdır. Minimum aylıq əməkhaqqının artırılması üçün 271 milyon manat, dövlət qulluqçularının əmək haqlarının artırılması üçün 54 milyon manat, əmək pensiyalarının baza hissəsinin iki mərhələdə artımı üçün 248,6 milyon manat, ünvanlı dövlət sosial yardımının tətbiqi ilə əlaqədar ehtiyac meyarının ödənilməsi üçün 78 milyon manat, sosial müavinətlərin həddinin orta hesabla 35 faiz artırılması üçün 12 milyon manat vəsait nəzərdə tutulmuşdur.
Pensiya islahatlarının davamı olaraq 2007-ci ildən hərbçilərin pensiyalarının Dövlət Sosial Müdafiə Fondundan verilməsi nəzərdə tutulmuş, bu məqsədlə dövlət büdcəsindən 80,6 milyon manat ayrılmışdır.
Ölkə iqtisadiyyatı üçün ali və orta ixtisas təhsilli mütəxəssislərin hazırlanmasına, o cümlədən Türkiyə, Rusiya və Ukraynada dövlət hesabına təhsil alan aspirant, tələbə və şagirdlərin aylıq təqaüdlərinin artırılmasına 1,1 milyon manat əlavə vəsait nəzərdə tutulmuşdur.
Maliyyə naziri demişdir ki, şəhid ailələrinin sosial vəziyyətinin yaxşılaşdırılması ilə əlaqədar deputatların irəli sürdükləri təkliflər nəzərdən keçirilmiş və bu kateqoriyadan olan ailələrə Prezident təqaüdü təsis edilməsi qərara alınmışdır. Bu məqsədlə büdcədən əlavə olaraq 11 milyon manat sərf olunacaqdır.
Büdcə layihəsinin müzakirələri zamanı elm sahəsinə qayğının artırılması, o cümlədən Milli Elmlər Akademiyasında çalışanların əmək haqlarının artırılmasına dair fikirlər səslənmişdir. S.Şərifov bildirmişdir ki, AMEA-nın 2007-ci il üçün xərclərinə əlavə olaraq 5,3 milyon manat vəsait ayrılmışdır.
Təhsil sisteminin cari xərclərini 47,4 faiz, yaxud 776 milyon manat artırmaq planlaşdırılmışdır. Gələn il 105 min 600 şagird yeri olan 292 yeni məktəb binasının tikilməsinə, 100 məktəbin əsaslı təmirinə başlanacaqdır.
Sənəddə səhiyyənin cari xərclərinə 283 milyon manat vəsait ayrılması nəzərdə tutulmuşdur ki, bu da ötən illə müqayisədə 47,5 faiz çoxdur.
Büdcədən mədəniyyət sahəsinin cari xərcləri üçün 76,9 milyon manat ayrılması nəzərdə tutulmuşdur. Mədəniyyət sahəsində bir sıra ciddi layihələrin maliyyələşdirilməsinə tələb olunan məbləğlər investisiya xərclərindən ayrılacaqdır.
Nazir vurğulamışdır ki, Azərbaycan Prezidenti İlham Əliyevin tapşırığı ilə ölkə əhalisinin içməli su ilə təchizatının yaxşılaşdırılmasına dair Dövlət proqramının işlənib hazırlanmasına başlanmışdır. Bu tədbirlərin icrasına 2007-ci ilin büdcəsindən 6 milyon əlavə vəsait köçürüləcəkdir.
Sənəddə bələdiyyələrin işinin yaxşılaşdırılması, rabitə, informasiya və kommunikasiya texnologiyaları sistemlərinin, elektrik enerjisi sektorunun, yol-nəqliyyat sektorunun təkmilləşdiriməsi üçün əlavə xərclər nəzərdə tutulmuşdur.
Yeni büdcəyə əsasən, 2007-ci ildə gəlirlər 39,1 faiz artaraq 5,336 milyard manat, xərclər 42 faiz artaraq 5,715 milyard manat təşkil edəcəkdir. Büdcə kəsiri ÜDM-in 1,7 faizi qədər olacaqdır. Kəsirin yerini dövlət istiqrazlarının özəlləşdirilməsi, habelə ölkə daxilində və xaricdə yerləşdirilməsi hesabına doldurmaq planlaşdırılır.
Deputatlar “Azərbaycan Respublikası Dövlət Sosial Müdafiə Fondunun 2007-ci il üçün büdcəsi haqqında” qanun layihəsini də təsdiq etmişlər.
Dövlət Sosial Müdafiə Fondunun sədri Səlim Müslümov müzakirələrə yekun vuraraq bildirmişdir ki, qanuna 2 dəyişiklik edilməsi qərara alınmışdır. Birincisi, Dövlət Sosial Müdafiə Fondunun gəlirlərində də müəyyən dəyişiklik edilmişdir. Məcburi dövlət sosial sığorta haqlarının həcmi 50 min manat artırılmış və buna uyğun olaraq dövlət büdcəsindən Dövlət Sosial Sığorta Fonduna edilən transferin həcmi 50 min manat azaldılmışdır. İkinci dəyişikliyə əsasən Azərbaycan Respublikası Həmkarlar İttifaqları Konfederasiyasının xətti ilə sığorta olunan şəxslərin müalicəsi üçün xərclər daha 100 min manat artırılmış, əmək qabiliyyətinin müvəqqəti itirilməsinə görə müavinətlər 100 min manat azaldılmış və həmin vəsait konfederasiyanın xətti ilə vətəndaşların müalicə xərclərinə yönəldilmişdir. İyul ayının 1-dən pensiyaların baza hissəsinin yenidən artırılması nəzərdə tutulmuşdur.
İclasda “Azərbaycan Respublikasında 2007-ci il üçün yaşayış minimumu və ehtiyac meyarının həddi haqqında”, “Büdcə sistemi haqqında”, “Dövlət qulluğu haqqında”, “Dövlət rüsumu haqqında”, “Mədəniyyət haqqında”, “Ölkədən getmək, ölkəyə gəlmək və pasportlar haqqında”, “Sosial sığorta haqqında”, “Əmək pensiyaları haqqında”, “Azərbaycan Respublikasının bəzi qanunvericilik aktlarına dəyişikliklər və əlavələr edilməsi barədə”, “Banklar və digər kredit təşkilatları tərəfindən əhalinin əmanətləri üzrə ödənilən faiz məbləğlərindən, habelə investisiya qiymətli kağızları üzrə dividend və faizlərdən gəlir vergisinin tutulması üzrə güzəştlərin müəyyən edilməsi haqqında”, “Azərbaycan Respublikası Milli Məclisinin 2007-ci il üçün xərclər smetası haqqında”, “Azərbaycan Respublikası Hesablama Palatasının 2007-cı il üçün xərclər smetası haqqında” qanun layihələri də təsdiq olunmuşdur.
Bölmənin digər xəbərləri
