SİYASƏT
MİLLİ MƏCLİSDƏ QƏBUL
Aprelin 12-də Milli Məclis sədrinin birinci müavini Arif Rəhimzadə Böyük Britaniyanın “Links” təşkilatının icraçı direktoru Denis Semmadı qəbul etmişdir.
Söhbət zamanı qonaq ölkələrimiz arasında əlaqələrin inkişafından məmnunluğunu bildirdi. Onun təmsil etdiyi təşkilatın xətti ilə ötən il Londonda Milli Məclisin nümayəndə heyəti ilə keçirilən görüşləri xatırlayan Denis Semmad növbəti dəfə deputatlarımızı Böyük Britaniyaya dəvət etdi. O, eyni zamanda bildirdi ki, Londonda Azərbaycan, Gürcüstan və Ermənistan parlament nümayəndə heyətlərinin görüşü də nəzərdə tutulmuşdur.
Milli Məclis sədrinin birinci müavini parlament nümayəndə heyətinin Londona dəvət edildiyi üçün təşəkkürünü bildirdi. Azərbaycan, Gürcüstan və Ermənistan parlament nümayəndə heyətlərinin görüşü barədə isə öz fikirlərini açıqlayaraq qeyd etdi ki, bu tədbirin məqsədi bizi qane edəcəyi təqdirdə görüşə qatıla bilərik. A.Rəhimzadə daha sonra dedi: Bəzi beynəlxalq qurumlarda belə bir fikir səslənir ki, Azərbaycanla Ermənistan arasında əməkdaşlıq mümkündür. Bu fikir kökündən yanlışdır. Azərbaycan tərəfi dəfələrlə bildirmişdir ki, Ermənistanın işğal etdiyi ərazilər azad olunmayınca, qaçqınlar öz doğma yurd-yuvalarına qayıtmayınca bu ölkə ilə əməkdaşlıqdan qətiyyən söhbət gedə bilməz.
Görüşdə tərəfləri maraqlandıran digər məsələlər barədə də fikir mübadiləsi aparılmışdır.
Milli Məclisin Mətbuat
Xidməti
Bölmənin digər xəbərləri
