MİLLİ MƏCLİSİN DEPUTATLARI ATƏT PA-NIN PAYIZ SESSİYASINDA İŞTİRAK EDƏCƏKLƏR

14.11.2006 [20:16]
Çap et
A⁺ A^-

AZƏRTAC xəbər verir ki, Milli Məclis sədrinin müavini Bahar Muradovanın başçılığı ilə parlament nümayəndə heyəti ATƏT Parlament Assambleyasının payız sessiyasında iştirak etmək üçün noyabrın 15-dən 23-dək Maltanın Valetta şəhərində səfərdə olacaqdır.

Milli Məclisin mətbuat xidmətindən bildirmişlər ki, nümayəndə heyətinin tərkibinə deputatlar Fəttah Heydərov və Fazil Mustafayev daxildirlər.

Sessiya çərçivəsində “İmmiqrasiya, inteqrasiya və mədəniyyətlərarası dialoq: ATƏT-in rolu” mövzusunda parlament konfransı, Daimi Komitənin iclası və qurumun Aralıq dənizi bölgəsi ilə bağlı forumu keçiriləcəkdir.

Tədbirlərdə miqrasiya və təhlükəsizlik, miqrasiya proseslərində dövlət sərhədlərinin rolu, mədəni müxtəliflik və milli xüsusiyyətlərin inkişafı, çoxmillətli cəmiyyətlərin problemləri, Yaxın Şərqdə vəziyyət və digər məsələlərlə bağlı fikir mübadiləsi aparılacaqdır.

Parlament nümayəndə heyətinin üzvləri gündəliyə çıxarılacaq məsələlər ətrafında gedən müzakirələrdə iştirak edəcək, öz fikirlərini açıqlayacaqlar.