Milli Məclisin nümayəndə heyəti Moskvada keçiriləcək II Beynəlxalq Parlament Forumunda iştirak edəcəkdir
Bakı, 12 noyabr (AZƏRTAC). Azərbaycan Respublikası Milli Məclisi sədrinin müavini Valeh Ələsgərov və deputat Rüfət Quliyev II Beynəlxalq Parlament Forumunda iştirak etmək üçün noyabrın 13-də Rusiya Federasiyasının paytaxtı Moskva şəhərinə səfərə yola düşəcəklər.
Milli Məclisin mətbuat xidmətindən AZƏRTAC-a bildirmişlər ki, Rusiya Konstitusiyasının 20 illiyinə həsr edilmiş həmin tədbirdə parlamentarilər, aparıcı alimlər və ekspertlər, dünyanın müxtəlif ölkələrinin ictimai-siyasi və işgüzar dairələrinin nümayəndələri iştirak edəcəklər.
“Konstitusiya. Demokratiya. Parlamentarizm” mövzusunda keçiriləcək Forumda Rusiya və dünya təcrübəsinə nəzər salınacaqdır. Tematik seksiyalarda parlament, demokratik dəyərlər və ictimai rəy, müasir dünyada parlament diplomatiyasının formaları, siyasi sistemlərin və seçki sistemlərinin inkişafı sahəsində beynəlxalq təcrübə, konstitusiya islahatları, qanun yaradıcılığında inkişaf tendensiyaları mövzuları ətrafında geniş fikir mübadiləsi aparılacaqdır.
Azərbaycan parlamentinin təmsilçiləri müzakirələrdə yaxından iştirak edəcəklər.
Səfər noyabrın 15-də başa çatacaqdır.
Bölmənin digər xəbərləri
