Milyarder Lauder rəssam Şilenin əsərlərini nasistlərin qətlə yetirdiyi kolleksiyaçının varislərinə geri qaytaracaq
Bakı, 21 sentyabr, AZƏRTAC
Milyarder Ronald Lauder rəssam Eqon Şilenin əsərlərini Frits Qryunbaumun varislərinə könüllü olaraq geri qaytaracaq. AZƏRTAC xarici KİV-ə istinadla xəbər verir ki, F.Qryunbaum bu əsərlərin Daxau həbs düşərgəsində qətlə yetirilmiş keçmiş sahibidir.
Manhetten ərazi prokurorluğunun məlumatına əsasən, Lauder və digər bir kolleksiyaçı üç muzeylə birlikdə könüllü olaraq Avstriya ekspressionisti Eqon Şilenin ümumi dəyəri 9,5 milyon dollar olan yeddi əsərini F.Qryunbaumun varislərinə təhvil verib. 1912-ci ilə aid olan “Mən antitezləri sevirəm” əsəri 2,75 milyon dollar dəyərində qiymətləndirilir.
“Lauder sözügedən əl işlərini kolleksiyanın Qryunbaumun əlindən qanunsuz şəkildə alınmasından onilliklər keçəndən sonra art-diler vasitəsilə əldə edib”, - deyə milyarderin nümayəndəsi bildirib.
Qryunbaumun kolleksiyası nasistlər tərəfindən qarət olunub. Bunun nəticəsində onun varisləri dəfələrlə əsərlərin yeni sahibləri ilə məhkəmələrdə çəkişməli olublar.
Bölmənin digər xəbərləri
