Misirdə keçirilən həndbol üzrə dünya çempionatında qalmaqal baş verib
Qahirə, 27 yanvar, AZƏRTAC
Misirdə COVID-19 pandemiyası şəraitində və azarkeşlərin iştirakı olmadan keçirilən həndbol üzrə dünya çempionatında qalmaqal yaşanıb.
AZƏRTAC xəbər verir ki, iki gün əvvəl Misir komandası ilə heç-heçə (25:25) edən Sloveniya yığmasının rəhbərliyi oyunçuların keyfiyyətsiz yeməklərdən qəsdən zəhərləndiyi iddiasını irəli sürüb. Həmin görüşdən sonra dörddəbir finala vəsiqə qazanan və Prezident Əbdülfəttah əl-Sisinin təbrik etdiyi Misir Həndbol Federasiyası və bu ölkənin Səhiyyə Nazirliyi isə bu iddianı rədd edib.
Sloveniya Həndbol Federasiyasının sədri Qoran Çvijiç Misir rəsmilərinin çempionatı pis təşkil etmələrini qınayıb. O qeyd edib ki, Misir yığması ilə oyundan 24 saat əvvəl keyfiyyətsiz yeməklərdən zəhərlənən komanda üzvlərinin guya COVID-19-a yoluxduğu barədə yalan xəbərlər də yayılıb. Q.Çvijiç əlavə edib ki, zəhərlənmiş həndbolçuların ağır vəziyyətdə otelə çatdırılması və Misirin tibb personalının laqeydliyi də videokamera ilə qeydə alınıb.
Bu iddiaları cavablandıran dünya çempionatının tibbi komissiyasının sədri Alaa Eid bildirib ki, hazırda yeməklər, içməli su və hovuzdan götürülmüş nümunələr analizə verilib.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
