Monteneqronun məşhur “Sveti Stefan” oteli 65 yaşını boş qeyd edib
Podqoritsa, 15 iyul, AZƏRTAC
Monteneqronun incisi sayılan və Adriatik dənizi sahilində yerləşən sirli Sveti Stefan adasındakı şəhər-otel 65 illik yubileyini turistlərə qapalı qeyd edib.
AZƏRTAC xəbər verir ki, bir vaxtlar ölkə turizminin ticarət nişanı olan və onilliklər ərzində dünyanın siyasi elitasını, aktyorlarını, müğənnilərini və idmançılarını özünə cəlb edən unikal “City-Hotel Sveti Stefan”ın əsas qapısında beş ildir qıfıl asılıb.
Otelin tarixi kommunizm dövründən başlayır. Əsrlər boyu istilalara tab gətirən, orta əsr qalası olan bu qeyri-adi balıqçı kəndi 1960-cı il iyulun ortasında dəbli kurorta çevrilib, tezliklə dəbdəbə və prestijlə sinonimləşib. Təxminən 250 çarpayılıq otellə yanaşı, adadakı dörd kilsədən biri kazino kimi fəaliyyət göstərib. Sveti Stefan adasının “Adriatikin Monakosu” adlandırılmasına səbəb burada kazinonun fəaliyyət göstərməsi olub. Bura beynəlxalq “Aman Resorts” qrupunun 5 ulduzlu franşizi olan “Aman Sveti Stefan” kurortu ilə tanınıb. 1972-ci ildə ada ən unikal turizm məkanı olduğuna görə mükafata layiq görülüb.
Ötən əsrin 70-80-ci illərində dövlət tərəfindən idarə olunduğu “qızıl çağ”ında kral və imperatorların, dünya siyasətçilərinin və Hollivud ulduzlarının ziyarət etdiyi otel hazırda baxımsız kompleksə çevrilib. Bir vaxtların elit kurortu 2021-ci ildən kirayəçi - “Adriatic Properties” şirkəti ilə Monteneqro hökuməti arasındakı mübahisə səbəbindən Sveti Stefan və Villa Miloçer şəhər mehmanxanası bağlandıqdan sonra tənəzzülə uğrayıb. Elit mehmanxana getdikcə uçuq-sökük və baxımsız hala düşür. Otel açıldığı gündən 65 illiyini qeyd etdiyi bu vaxta kimi dünyanın turist ictimaiyyətinə hələ də ən yaxşılar sırasında olduğu mesajı vermək əvəzinə, bu gün bunun əksi baş verir.
Dar və uzun yol ilə quruya bağlanan adanın sahəsi 1,46 hektardır. Adada bir neçə köhnə kilsə, o cümlədən adanın adını daşıyan Müqəddəs Stefana həsr olunmuş kilsə var. Ada ictimaiyyət üçün açıq deyil. Buranın 364 nəfər əhalisi var ki, onların 206-sı serbiyalı, 127-si monteneqrolu, 31-i isə digər millətlərdəndir. Bura Monteneqro turizminin məşhurlaşmasında mühüm yer tutur, ölkənin təbliğində hər zaman bu turizm brendinin - “Sveti Stefan” fotosu yer alır.
Nihad Budaqov
AZƏRTAC-ın xüsusi müxbiri
Podqoritsa
Bölmənin digər xəbərləri
