MOSKVADA MDB ÖLKƏLƏRİ SƏHİYYƏ NAZİRLƏRİNİN GÖRÜŞÜ KEÇİRİLMİŞDİR
Nazirlər “Böyük səkkizlik” ölkələri liderlərinin Sankt-Peterburqda Rusiyanın sədrliyi ilə keçiriləcək zirvə toplantısı ərəfəsində görüşmüşlər. Zirvə toplantısında energetika təhlükəsizliyinin qlobal məsələləri ilə yanaşı, digər problemlər, o cümlədən səhiyyə məsələləri də nəzərdən keçiriləcəkdir. Bu, görüşün gündəlyinə öz təsirini göstərmişdir. Görüş zamanı quş qripinin, İÇV infeksiyasının və digər təhlükəli yoluxucu xəstəliklərin qarşısının alınması tədbirlərinin əlaqələndirilməsi kimi transmilli problemlər müzakirə olunmuşdur.
Rusiyanın sosial inkişaf və səhiyyə naziri Mixail Zurabov geniş məruzə ilə çıxış etmişdir.
Oqtay Şirəliyev AZƏRTAC-ın müxbirinə bildirmişdir ki, “Böyük səkkizlik” ölkələri başçılarının zirvə toplantısında MDB səhiyyə nazirlərinin görüşünün yekunları ilə bağlı məruzə ediləcəkdir. Bu gün yoluxucu xəstəliklərlə mübarizəyə dair vahid taktika işlənib hazırlanır. Yoluxucu xəstəliklərin yayılması problemini elliklə, həmsərhəd dövlətlərlə birlikdə həll etmək lazımdır. O.Şirəliyev demişdir: “Biz Azərbaycanın bu yaxınlarda üzləşdiyi quş qripi probleminin həlli sahəsində təcrübəmizdən irəli gələn vahid tədbirlər proqramına bir sıra düzəlişlər təklif etdik. Hazırda Azərbaycanda quş qripi təhlükəsi yoxdur. Lakin bu məsələni daim diqqət mərkəzində saxlamaq lazımdır”.
Bölmənin digər xəbərləri
