MOSULDA ATIŞMA NƏTİCƏSİNDƏ 12 ADAM HƏLAK OLUB
İraqın şimalında yerləşən Mosul şəhərində faciə baş vermişdir. İTAR-TASS agentliyindən AZƏRTAC-a daxil olmuş xəbərə görə, hər şey şəhərin mərkəzi meydanında kortəbii mitinqdən başlanmışdır. Mosullular amerikalıların təyin etdiyi yeni qubernatorun nitqini dinləyirdilər. Yəqin ki, onun nitqi Mosul sakinlərinə həddən ziyadə Amerikapərəst nitq kimi görünmüşdür, ona görə də əl-Cəburiyə sözünü tamamlamağa imkan verməmişlər. Kütlənin içindən qubernatorun üstünə daşlar yağdırılmış, onun maşınını yandırmışlar. Elə bu dəm Amerika hərbçiləri kütləyə atəş açmışlar. Şahidlər deyirlər ki, əsgərlər hətta adamlar vahimə içində dağılışmağa başladıqda da onları gülləyə tutmuşlar.
Hərbçilər iddia edirlər ki, mitinq iştirakçılarına damdan iki yaraqlı atəş açmışdır. Hadisə nəticəsində 12 nəfər həlak olmuş, 60-dan artıq adam yaralanmışdır. Xəsarət alanlar arasında uşaqlar da vardır.
İndi Mosulda asayiş nisbətən bərpa edilmişdir. Lakin iraqlılar deyirlər ki, hərbçilər ölkənin şəhərlərinin küçələrində təhlükəsizliyin təmin olunması üçün heç bir iş görmürlər.
Bölmənin digər xəbərləri
