MSTİSLAV ROSTROPOVİÇ HAQQINDA FİLM ÇƏKİLİR
“Salnamə” studiyasında dünya şöhrətli musiqiçi, həmvətənimiz Mstislav Rostropoviçə həsr edilmiş “Bundan da doğma torpaq yoxdur” filminin çəkilişinə başlanmışdır.
Mədəniyyət Nazirliyindən bildirmişlər ki, filmi gələn ilin mayında ekranlara buraxmaq nəzərdə tutulmuşdur. Həmin vaxtdadək Bakı Dövlət Filarmoniyasının əsaslı təmirdən sonra açılışı da gözlənilir. Bərpa işlərinə Mstislav Rostropoviç də öz töhfəsini vermişdir.
Maestronun həyatının Bakı dövründən və geniş yaradıcılığından bəhs edəcək film məşhur həmvətənimizin ifasında musiqi ilə müşaiyət olunacaqdır.
Tanınmış rejissor Ziya Şıxlinskinin çəkdiyi film iki hissədən ibarət olacaqdır. Birinci hissə Mstislav Rostropoviçdən, ikinci hissə isə onun xanımı, gözəl opera müğənnisi Qalina Vişnevskayadan bəhs edəcəkdir.
Bölmənin digər xəbərləri
