MÜASİR ŞAMAXI ULU ÖNDƏR HEYDƏR ƏLİYEV İSTƏKLƏRİNİN TƏNTƏNƏSİDİR
Bu fikir aprelin 10-da Şamaxıda YAP Mərkəzi Aparatının və Şamaxı Rayon İcra Hakimiyyətinin ulu öndərimiz Heydər Əliyevin 85 illik yubileyi ilə əlaqədar birgə təşkil etdikləri tədbirdə səsləndirilmişdir. Tədbir iştirakçıları və qonaqlar - Milli Məclisin deputatı, YAP icra katibinin müavini Siyavuş Novruzov, deputat Ərəstun Cavadov, YAP mərkəzi aparatının məsul işçisi Qalib Əsgərov və başqaları əvvəlcə ümummilli liderimizin şəhərin mərkəzində ucaldılmış abidəsini ziyarət etmiş, önünə tər çiçəklər qoymuşlar. Sonra qonaqlar Heydər Əliyev parkında aparılan yenidənqurma işləri, Heydər Əliyev muzeyinin tikintisi ilə tanış olmuşlar.
Rayon icra hakimiyyətinin konfrans zalında keçirilən tədbirdə icra başçısı Nazim İsmayılov xalqımızın böyük oğlu, müstəqil Azərbaycanın memarı və qurucusu Heydər Əliyevin zəngin həyat və fəaliyyəti barədə ətraflı danışmışdır.
Prezident təqaüdçüsü Mariya Nikolayevna, YAP rayon təşkilatı ərazi təşkilatlarının sədrləri Şamama Məmmədova, Eyvaz Eminaliyev, rayon gənclər və idman idarəsinin rəisi Şahmar Hüseynov çıxış etmişlər.
Qeyd olunmuşdur ki, dahi Heydər Əliyevin 1969-cu ildə hakimiyyətə gəlişi ilə Azərbaycan böyük inkişaf yoluna qədəm qoymuşdur. Təkcə 1970-82-ci illərdə sənaye istehsalı 2,7 dəfə artmış, on üç il ərzində 101,5 milyard manatlıq məhsul istehsal olunmuşdu. Bu, əvvəlki 50 ilin istehsalına bərabər idi. Azərbaycanda axırıncı 50 ildəki göstəricidən 60 faiz çox - 22 milyon kvadratmetr mənzil sahəsi tikilib istifadəyə verilmişdi. Bu müddətdə illik üzüm istehsalı 2 milyon tonu ötüb keçmiş, pambıq, tərəvəz, meyvə istehsalı 2,5 dəfə artmışdı. O illərdə Azərbaycanda həm də şəhərlər, qəsəbələr, kəndlər yenidən qurulmuşdu.
Natiqlər vurğulamışlar ki, ulu öndərin uzaqgörənliyi sayəsində bugünkü müstəqilliyimizin əsası qoyulurdu. Bir tərəfdən azərbaycançılıq, milli özünüdərk hissi formalaşdırılır, digər tərəfdən respublikada mühüm strateji sahələrin yaradılmasına xüsusi önəm verilirdi. İstedadlı gənclərə xüsusi qayğı göstərilir, yüzlərlə gənc ittifaqın tanınmış ali məktəblərinə oxumağa göndərilirdi. Ulu öndərin gərgin səyi sayəsində 1978-ci il Konstitusiyasında Azərbaycan dili dövlət statusu almışdı. Bakının ən görkəmli yerlərində İmadəddin Nəsimi, Cəfər Cabbarlı, Nəriman Nərimanovun və digər görkəmli övladlarımızın heykəlləri ucaldılırdı. Respublikanın rəhbəri 1982-ci ildə Şuşada Molla Pənah Vaqifin məqbərəsinin açılışında şəxsən iştirak etmişdi.
Natiqlər Heydər Əliyevin Azərbaycan xalqı qarşısındakı böyük xidmətlərindən biri kimi YAP-ın yaradılmasını xüsusi qeyd etdilər. 1992-ci il noyabrın 21-də Naxçıvanda təsis edilən bu partiya Azərbaycan üçün misilsiz işlər görmüşdür.
Tədbirdə ulu öndərin qədim Şamaxıya göstərdiyi diqqət və qayğıdan da ətraflı danışılmışdır. Qeyd edilmişdir ki, dahi rəhbərimiz 1970-ci ildən 1982-ci ilə kimi 14 dəfə Şamaxıda olmuşdur. Onun şəxsi tapşırığı və göstərişi ilə 1978-ci il yanvarın 21-də “Şamaxı rayonunun iqtisadiyyatını və mədəniyyətini daha da inkişaf etdirmək tədbirləri haqqında” mühüm dövlət qərarı qəbul edilmişdir. Əslində Şamaxı bu qərardan sonra yenidən tikilib qurulmuş, onun infrastrukturu möhkəmləndirilmiş, iqtisadi və mədəni inkişafı təmin olunmuşdur.
Bəyan edilmişdir ki, qədim Şamaxı torpağının sakinləri həmişə xalqımızın dahi oğlu Heydər Əliyevin ətrafında sıx birləşmiş, onun bütün tapşırıqlarını səylə yerinə yetirmişlər. Bu ənənəni şamaxılılar inamla davam etdirərək, böyük Heydər Əliyev məktəbinin layiqli davamçısı Prezident İlham Əliyevin ətrafında sıx birləşərək hər işdə ona dəstək verirlər.
Bu il prezident seçkiləri ili olduğunu vurğulayan natiqlər əminliklə bildirmişlər ki, xalqına misilsiz xidmətlər göstərən, böyük Heydər Əliyev ideyalarını layiqincə həyata keçirən, Azərbaycanı dünyanın ən inkişaf etmiş dövlətlərindən birinə çevirən, regionlara yeni həyat bəxş edən İlham Əliyev şamaxılıların alternativsiz namizədidir.
“Evsen” şirkətlər qrupunun prezidenti, türk iş adamı Əli Evsen çıxış edərək Azərbaycanda iş adamları, sahibkarlar üçün yaradılan münbit şəraitdən razılığını bildirmişdir. O, YAP rayon təşkilatına Şamaxıda istehsal olunmuş “AzSamand” avtomobilinin açarını təqdim etmişdir.
Milli Məclisin deputatı, YAP icra katibinin müavini Siyavuş Novruzov çıxış edərək ulu öndər Heydər Əliyevin son dərəcə zəngin olan dövlətçilik fəaliyyətinin ayrı-ayrı məqamlarından söz açmışdır.
Ümummilli liderimiz Heydər Əliyevin həyat və fəaliyyətindən bəhs edən qısametrajlı film nümayış etdirilmişdir.
YAP sıralarına qəbul olunmuş bir qrup gəncə üzvlik vəsiqəsi təqdim edilmişdir.
Bölmənin digər xəbərləri
