Müstəqil Dövlətlər Birliyinin Parlamentlərarası Assambleyasında “Rəqəmsal səhiyyə haqqında” model qanun layihəsi hazırlanacaq
Bakı, 16 iyul, AZƏRTAC
Müstəqil Dövlətlər Birliyinə üzv ölkələrin ekspertləri “Rəqəmsal səhiyyə haqqında” model qanun hazırlanması təklifini dəstəkləyiblər. Bu qanun Birlik məkanında bütün ölkələr üçün ümumi hüquqi əsas formalaşdırmağa imkan verəcək. İşçi qrupun tərkibinə Ümumdünya Səhiyyə Təşkilatının və Rabitə sahəsində Regional birliyin nümayəndələrini daxil etmək təklif olunub.
AZƏRTAC MDB İcraiyyə Komitəsinin saytına istinadla xəbər verir ki, bu barədə MDB İcraiyyə Komitəsinin milli elektron səhiyyə sistemlərinin inteqrasiyası məsələlərinə dair işçi qrupun iclasında söhbət gedib.
Müstəqil Dövlətlər Birliyinin Parlamentlərarası Assambleyasının “Rəqəmsal səhiyyə haqqında” model qanun layihəsinin hazırlanması üzrə işçi qrupun rəhbəri, Rusiya Federasiyası Səhiyyə Nazirliyinin İ.M.Seçenov adına Birinci Moskva Dövlət Tibb Universitetinin Rəqəmsal Tibb İnstitutunun direktoru Georgi Lebedev müşavirə iştirakçılarına həmin sənəd üzərində işlərin gedişi barədə məlumat verib.
G.Lebedev vurğulayıb ki, qanun layihəsinin əsas ideyası MDB ölkələrinin səhiyyə sistemləri subyektlərinin həm daxili milli səviyyədə, həm də beynəlxalq, dövlətlərarası səviyyədə qarşılıqlı fəaliyyətinin keyfiyyətcə yeni, müasir normalarını yaratmaqdan ibarətdir.
Qanun layihəsi səhiyyə sahəsində ortaq məkanın hüquqi əsasını formalaşdırır. Bu, informasiya mübadiləsi qaydalarını və proseslərini standartlaşdırmağa, süni intellekt texnologiyalarının sürətli inkişafını təmin etməyə, fərdiyyətçiliyini itirmiş biotibbi məlumatların və ortaq açıq süni intellekt kitabxanalarının formalaşdırılması, müvafiq məlumatların toplanması, emal edilməsi, saxlanması və dərc olunması üçün ümumi platformalar yaratmağa imkan verəcək. Bu da öz növbəsində transsərhəd, o cümlədən distant tibbi xidmətlərin inkişafına, tibbi yardımın təşkilinin ən mütərəqqi, istehsal proseslərinin informasiyalaşdırılmasına və avtomatlaşdırılmasına, ekspert resurslarının mərkəzləşdirilməsinə əsaslanan modellərinin tətbiqinə xidmət edəcək.
İşlənib hazırlanmaqda olan yeni qanun fövqəladə hallarda, o cümlədən informasiya sistemlərinin standartlaşdırılması və inteqrasiyası, real zaman və operativ idarəetmə rejimində məlumatların təhlil vasitələrindən, resursların yenidən bölüşdülüməsi vasitələrindən və mexanizmlərindən istifadə edilməsi hesabına kollektiv təhlükəsizlik sistemini gücləndirməyə kömək edəcək.
Georgi Lebedevin sözlərinə görə, beynəlxalq işçi qrupun tərkibinə MDB üzvü olan bütün dövlətlərin səhiyyə nazirliklərinin nümayəndələri daxildir.
Qanun layihəsi bu il oktyabr ayında MDB Parlamentlərarası Assambleyasının sosial siyasət və insan haqları üzrə daimi komissiyasının iclasında təqdim ediləcək.
MDB İcraiyyə Komitəsinin işçi qrupu qanun layihəsinin işlənib hazırlanması təklifini dəstəkləməyi və beynəlxalq işçi qrupunun tərkibinə Ümumdünya Səhiyyə Təşkilatının və Regional birliyin Rabitə sahəsində nümayəndələrini daxil olunmasını tövsiyə etməyi qərara alıb.
Bölmənin digər xəbərləri
