MÜSTƏQİLLİK ADI ALTINDA HƏR HANSI RESPUBLIKA YARADILMASI YOLVERİLMƏZDİR
AZƏRTAC-ın xüsusi müxbiri xəbər verir ki, Avropa Şurası Parlament Assambleyasının (AŞPA) payız sessiyasının ikinci günündə Gürcüstanda yaranmış vəziyyət müzakirə olunmuşdur. Əvvəlcə həmməruzəçilər Lük Van der Brande və Matias Erşönün hesabatları dinlənilmişdir. Məruzə ətrafında çıxış edən deputatlar dünyanın qaynar nöqtələri arasında Cənubi Qafqaz bölgəsindəki münaqişələrin daha həssas olduğunu vurğulamış, Cənubi Osetyanın müstəqilliyinin tanınmasının regionda vəziyyəti daha da ağırlaşdıracağını qeyd etmişlər. Bildirilmişdir ki, ölkələrin ərazi bütövlüyü və suverenliyinin tanınması Avropa Şurasının əsas prioritetlərindəndir. Münaqişənin silah gücünə həlli təşkilatın prinsiplərinə ziddddir və ölkə daxilində müstəqillik adı altında hər hansı respublika yaradılması yolverilməzdir.
Kiprin yunan icmasının lideri Demetris Xristofias sessiyadakı çıxışında adanın yunan və türk icmaları arasındakı münasibətlərdə yaxşılaşma olduğunu, Bosniya-Herseqovinya prezidenti Hilas Silajdciç ölkəsinin Avropa Şurası ailəsində layiqli yer tutduğunu, öhdəliklərin yerinə yetirilməsində, insan haqlarının qorunmasında müəyyən uğurlar əldə edildiyini bildirmişlər.
Sonda Nazirlər Komitəsinin sədi, İsveçin xarici işlər üzrə Dövlət katibi Frank Belfraj sessiyalararası müddətdə görülmüş işlərdən danışmış, deputatların suallarını cavablandırmışdır.
Bölmənin digər xəbərləri
