Myanma parlamenti ölkə prezidentini seçib
Bakı, 28 mart, AZƏRTAC
Myanma parlamenti hakim “Demokratiya uğrunda milli liqa” partiyasının namizədi Vin Mini ölkə prezidenti seçib.
AZƏRTAC İnterfax informasiya agentliyinə istinadla xəbər verir ki, səsvermədə iştirak edən 636 deputatın 403-ü əvvəllər Myanma parlamentinin aşağı palatasının spikeri vəzifəsini tutan Vin Minin namizədliyini dəstəkləyib. Vin Min “Demokratiya uğrunda milli liqa” partiyasının rəhbəri, Nobel sülh mükafatı laureatı Aun San Su Çjinin yaxın silahdaşıdır.
Həmçinin seçkilərdə hərbçilər tərəfindən irəli sürülən namizəd Min Şve 211 səs, parlamentin yuxarı palatasının namizədi Henri Van Thi isə 18 səs toplayıb.
Myanmada prezident birbaşa vətəndaşlar tərəfindən deyil, 3 parlament komitəsinin üzvlərindən təşkil olunan seçkiçilər kollegiyası tərəfindən seçilir. Komitələrdən hər biri prezident postuna öz namizədini irəli sürür, məğlub olan iki namizəd isə vitse-prezident postuna yiyələnir.
Qeyd edək ki, ötən həftə Myanmanın 71 yaşlı lideri U Thin Çjo iki illik prezidentlikdən sonra “dincəlməli olduğu” üçün istefa verəcəyini bildirmişdi.
Bölmənin digər xəbərləri
