Bakı, 18 oktyabr, AZƏRTAC

Oktyabrın 17-də Azərbaycan Universitetində Qeyri-Hökumət Təşkilatlarına Dövlət Dəstəyi Agentliyinin dəstəyi ilə “Gənclərin Anti-Narkomaniya” ictimai birliyinin həyata keçirdiyi “Həyatına dəyər ver” adlı sosialçarxın təqdimatı keçirilib.

AZƏRTAC xəbər verir ki, təqdimatdan sonra Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının daimi fəaliyyət göstərən İşçi Qrupunun, Daxili İşlər Nazirliyi Baş Narkotiklərlə Mübarizə İdarəsinin və Dini Qurumlarla İş üzrə Dövlət Komitəsinin əməkdaşları çıxış edərək, narkotik asılılıq probleminə dair biliklərinin artırılması məqsədilə iştirakçılara narkotik maddələrdən istifadənin risk amilləri, psixoaktiv maddələrin xüsusiyyətləri və onların sağlamlığa zərərli təsiri, narkotik asılılığın formalaşma mərhələləri, antinarkotik təbliğatın vacibliyindən, narkomanlığa qarşı mübarizə üsulları barədə geniş məlumat verilmiş və iştirakçıları maraqlandıran suallar ətrafında müzakirələr aparılıb.

Sonda tələbələrə Dövlət Komissiyasının daimi fəaliyyət göstərən İşçi Qrupu tərəfindən hazırlanmış “Narkotiklər haqqında həqiqəti bilin”,“Marixuana haqqında həqiqət” və “Psixotroplar maddələr haqqında həqiqət” adlı zəruri təbliğat materialları təqdim edilib.