Naxçıvan Dövlət Universitetində VII Beynəlxalq Kənd Təsərrüfatı Konqresi keçirilib
Naxçıvan, 30 sentyabr, AZƏRTAC
VII Beynəlxalq Kənd Təsərrüfatı Konqresi Naxçıvan Dövlət Universitetində (NDU) təşkil olunub.
NDU-nun Media və ictimaiyyətlə əlaqələr bölməsindən AZƏRTAC-ın Naxçıvan bürosuna bildirilib ki, əvvəlcə qonaqlar xalqımızın Ümummilli Lideri Heydər Əliyevin Naxçıvan şəhərinin mərkəzində ucalan abidəsi önünə gül dəstələri düzüb, Heydər Əliyev Muzeyini ziyarət ediblər.
Tədbir Ulu Öndər Heydər Əliyevin və Türkiyə Respublikasının banisi Mustafa Kamal Atatürkün, eləcə də Vətən uğrunda canlarından keçən şəhidlərin əziz xatirələrinin bir dəqiqəlik sükutla yad edilməsi ilə başlayıb.
Sonra Azərbaycan və Türkiyənin Dövlət himnləri səsləndirilib.
Türkiyənin Pamukkale, Giresun, İğdır, Kahramanmaraş Sütçü İmam universitetləri və Anadolu Ziraat Mühəndisliyi Dərnəyinin birgə təşkilatçılığı ilə keçirilən konqresdə çıxış edən Naxçıvan Dövlət Universitetinin rektoru Elbrus İsayev bildirib ki, NDU-nun strateji inkişaf planında qardaş Türkiyənin universitetləri ilə əlaqələr prioritet məsələdir. Bu baxımdan VII Beynəlxalq Kənd Təsərrüfatı Konqresi xüsusi əhəmiyyətə malikdir. Qeyd olunub ki, qardaş ölkənin bir çox universiteti ilə müxtəlif sahələrdə birgə əməkdaşlıq mövcuddur. Bunlar arasında kənd təsərrüfatı sahəsinə dair ixtisaslar mühüm yer tutur. Konqresin ali təhsil müəssisələri arasında keçirilməsi gələcəkdə bu istiqamətdə ixtisaslı kadrların yetişməsinə öz töhfəsini verəcək.
Türkiyənin Naxçıvandakı Baş konsulu Asip Kaya diqqətə çatdırıb ki, Türkiyə universitetləri Naxçıvan Dövlət Universiteti ilə akademik sahədə təcrübələrin paylaşılmasına xüsusi önəm verir. Asip Kaya VII Beynəlxalq Kənd Təsərrüfatı Konqresində veriləcək məlumatların universitetlərin akademik heyət və tələbələri üçün faydalı olacağına əminliyini bildirib. Vurğulanıb ki, son üç ildə Türkiyə ilə Azərbaycan arasında kənd təsərrüfatı sahəsində bir çox bəyannamə və Anlaşma Memorandumu imzalanıb.
Konqresinin sədri, professor Turan Qaradəniz, Kahramanmaraş Sütçü İmam Universitetinin rektoru, professor Alptekin Yasim, İğdır Universitetinin professoru Səlahəttin Çələbi, Dənizli vilayətinin Baklan bələdiyyəsinin sədri Yusuf Gülsevər, Dənizli vilayətinin Çameli bələdiyyəsinin sədri Cengiz Arslan Türkiyə ilə Azərbaycan arasında kənd təsərrüfatı sahəsində əməkdaşlıq əlaqələrindən bəhs ediblər. Bildirilib ki, qlobal istiləşmə, su ehtiyatlarının sürətlə tükənməsi, dünyada kənd təsərrüfatı məhsullarının istehsalının azalması fonunda ərzaq təhlükəsizliyi ölkələrin ən mühüm prioritetinə çevrilib.
Sonra Naxçıvan Dövlət Universitetinin Musiqi Kollecinin müəllim və tələbələrinin ifasında konsert proqramı olub.
Konqres bölmə iclasları ilə işini davam etdirib. 61 mövzu ilə davam edən iclaslarda dünyanın 7 ölkəsindən 70-dən çox məruzəçi iştirak edib.
Naxçıvan Dövlət Universitetinin Texniki Kollecində “Şirin su balıq təsərrüfatı”, “Budama və onun meyvəçilikdə əhəmiyyəti”, “İstixana becərilməsi zamanı yaranan problemlər”, “Lavanda bitkisinin yetişdirilməsi və onun Naxçıvan üçün əhəmiyyəti”, “Kartof becərilməsi və onun əhəmiyyəti”, “Quru və yaş şəraitdə yetişdirilən buğdanın müqayisəsi” və digər mövzularda çıxışlar dinlənilib.
Bölmə iclasları sual-cavab formasında davam edib.
İki gün davam edən konqresin sonunda iştirakçılara sertifikat təqdim olunub.
Qeyd edək ki, konqresə gələn yerli və xarici qonaqların muxtar respublikanın tarixi və turizm məkanlarına gəzintiləri də təşkil edilib.
Bölmənin digər xəbərləri
