Naxçıvanda “Görmək Gözəldir” aksiyası çərçivəsində qazilər və ailələri müayinədən keçiblər
Naxçıvan, 26 aprel, AZƏRTAC
"Konstitusiya və Suverenlik İli" çərçivəsində Naxçıvan Muxtar Respublikası Səhiyyə Nazirliyinin təşkilatçılığı ilə keçirilən “Görmək Gözəldir” adlı oftalmoloji profilaktik aksiya Naxçıvan Sağlamlıq Mərkəzində yekunlaşıb.
Nazirliyin mətbuat xidmətindən AZƏRTAC-ın bölgə müxbirinə bildirilib ki, aksiyanın sonuncu günündə bir qrup qazi və onların ailə üzvləri peşəkar oftalmoloqlar tərəfindən müayinə olunub. Müayinələrin məqsədi göz sağlamlığının qorunması, erkən diaqnostika və ehtiyac olduqda yönləndirmələrin təmin edilməsidir.
Qeyd edək ki, görkəmli oftalmoloq-alim, Əməkdar elm xadimi, akademik Zərifə xanım Əliyevanın anadan olmasının 102-ci ildönümünə həsr olunan aksiya çərçivəsində muxtar respublikanın müxtəlif bölgələrində yüzlərlə vətəndaş göz müayinəsindən keçib. Aksiya əhalinin sağlamlığının qorunmasına, xüsusilə həssas təbəqələrin tibbi xidmətlərə əlçatanlığının artırılmasına xidmət edir.
Bölmənin digər xəbərləri
