Naxçıvanda yeddi uşaq üzərində açıq ürək cərrahiyyəsi əməliyyatı aparılmışdır
Naxçıvan, 31 may (AZƏRTAC). Azərbaycan Respublikası Səhiyyə Nazirliyi M.A.Topçubaşov adına Elmi-Cərrahiyyə Mərkəzinin nəzdindəki Uşaq Ürək Cərrahiyyə Mərkəzinin həkim briqadası tərəfindən Naxçıvan Diaqnostika-Müalicə Mərkəzində 4 gündə yeddi uşaq üzərində açıq ürək cərrahiyyəsi əməliyyatları həyata keçirilmişdir.
Naxçıvan MR Səhiyyə Nazirliyinin mətbuat xidmətindən AZƏRTAC-a verilən məlumata görə, uğurla keçən əməliyyatları kardiocərrah Elnur Həsənov, uşaq cərrahı Faiq Mirzəzadə, habelə digər həkimlərin və tibb bacılarının təmsil olunduğu peşəkar heyət aparmışdır. Altı aylıq körpə Rəna Səfərova, on yaşlı Rəhman Məmmədov və bir yaşlı Zümrüd Əliyeva mitral qapaq prolapsına görə əməliyyat olunmuşlar. Digər körpə Fəridə Kəlbiyeva üzərində aparılan cərrahiyyə əməliyyatı nəticəsində ürəyin anadangəlmə mədəcikarası çəpər qüsuru aradan qaldırılmışdır.
Eyni zamanda, invaziv kardioloq Elnur İmanov iki gün ərzində anadangəlmə ürək qüsur olan 42 uşağı exokardioqrafik müayinədən keçirmişdir.
Qeyd edək, M.A.Topçubaşov adına Elmi-Cərrahiyyə Mərkəzinin nəzdindəki Uşaq Ürək Cərrahiyyə Mərkəzinin həkim briqadası, artıq üç ildir muxtar respublikada uşaqların ürək müayinəsini invaziv üsulla həyata keçirir.
Bölmənin digər xəbərləri
