Naxçıvanın səhiyyə sistemində həyata keçirilən islahatlar özünün keyfiyyətcə yeni mərhələsinə qədəm qoymuşdur
Bakı, 28 aprel (AZƏRTAC). Həyata keçirilən tədbirlər sayəsində Azərbaycanda ana və uşaq ölümü kəskin şəkildə aşağı düşmüşdür. Səhiyyə sistemində islahatların davam etdirilməsi, ölkə əhalisinin keyfiyyətli və əlverişli şərtlərlə tibbi xidmətlə təmin olunması “Azərbaycan 2020: gələcəyə baxış” İnkişaf Konsepsiyasında xüsusi yer tutur.
Səhiyyə Nazirliyinin mətbuat xidmətindən AZƏRTAC-a bildirmişlər ki, bu fikirlər Naxçıvanda keçirilən səyyar kollegiya iclasında səsləndirilmişdir.
Tədbirdə Azərbaycan Respublikasının səhiyyə naziri Oqtay Şirəliyev çıxış edərək bildirmişdir ki, ölkəmizdə ötən 10 il ərzində müşahidə edilən iqtisadi irəliləyiş, dövlətin iqtisadi potensialının artması səhiyyənin inkişafına və əhalinin sağlamlığının qorunması problemlərinin davamlı həllinə nail olmağa imkan yaratmışdır. Qeyd edilmişdir ki, ölkə başçısı tərəfindən müəyyən edilən uzunmüddətli inkişaf strategiyasının mühüm istiqamətlərindən biri kimi səhiyyənin inkişafını, əhalinin dünya standartlarına uyğun tibbi yardımla təchiz olunmasını təmin etmək üçün genişmiqyaslı islahatlar həyata keçirilir. Bu sahəyə hər il böyük həcmdə investisiyalar yatırılmaqdadır. Səhiyyəyə ayrılan büdcə vəsaiti son illərdə 10 dəfədən çox artmışdır. Respublikanın bölgәlәrində yüzlərlə tibb müәssisəsi tikilmış və ya əsaslı tәmir edilmiş, tibb müəssisәlәrinin hamısı müasir avadanlıqla tәchiz olunmuşdur.
İclasda Naxçıvan səhiyyəsinin keçdiyi inkişaf yoluna da nəzər salınmışdır. Vurğulanmışdır ki, Naxçıvan Muxtar Respublikası Ali Məclisi sədrinin yüksək diqqət və qayğısı nəticəsində səhiyyə sistemində həyata keçirilən islahatlar özünün keyfiyyətcə yeni mərhələsinə qədəm qoymuşdur.
Naxçıvan Muxtar Respublikasının səhiyyə naziri Niyazi Novruzov demişdir ki, əhalinin sağlamlığının qorunması, səhiyyə xidməti səviyyəsinin daha da yaxşılaşdırılması, yeni səhiyyə müəssisələrinin istifadəyə verilməsi bu gün muxtar respublikada uğurla həyata keçirilən sosial-iqtisadi siyasətin mühüm istiqamətlərindən biridir. Tikilən yeni xəstəxanaların, həkim ambulatoriyalarının, feldşer-mama məntəqələrinin müasir tibbi avadanlıqlarla təchiz edilməsi əhalinin sağlamlığının qorunması işində əsaslı dönüş yaratmışdır. Səhiyyə müəssisələrində keyfiyyətli dərman və tibbi preparatlarla təchizat yaxşılaşdırılmış, ixtisaslı kadrların hazırlanması, əhali arasında yoluxucu xəstəliklərin profilaktikası, insanların sağlamlıqlarının qorunması prioritet vəzifəyə çevrilmişdir.
Azərbaycanda, eləcə də onun ayrılmaz tərkib hissəsi olan və 90 illik yubileyi qeyd edilən Naxçıvan Muxtar Respublikasında səhiyyə sahəsində əldə edilən uğurlar tədbir iştirakçılarının diqqətinə çatdırılmışdır. Bildirilmişdir ki, Azərbaycan Respublikasında, o cümlədən muxtar respublikada əhaliyə göstərilən tibbi xidmətin keyfiyyətinin artırılmasında səhiyyənin ayrı-ayrı sahələri üzrə qəbul edilmiş və büdcədən maliyyələşdirilən dövlət proqramlarının xüsusi rolu olmuşdur.
Tədbirdə çıxış edənlər ölkəmizdə səhiyyə sahəsinin xalqımızın ümummilli lideri Heydər Əliyevin hakimiyyətə gəlişindən sonra böyük inkişaf yolu keçdiyini vurğulamışlar.
Sonda bir qrup səhiyyə işçisinə Azərbaycan Respublikası Səhiyyə Nazirliyinin “Səhiyyə əlaçısı” döş nişanı və fəxri fərmanları təqdim edilmişdir.
Bölmənin digər xəbərləri
