Nazir: Qanunvericiliyə əsasən məşqçilik fəaliyyətində lisenziya göstərmək tələb olunmur
Bakı, 4 may, AZƏRTAC
Çox təəssüf doğuran hadisədir. Bu hadisə yəqin ki, bir fərdin cinayət ehtimalı daşıyan davranışı ilə əlaqədardır. İnanmıram ki, bu hadisə bütün məşqçilərin, idmanın və idman zallarının fəaliyyətinə kölgə salacaq.
AZƏRTAC xəbər verir ki, bunu jurnalistlərə açıqlamasında elm və təhsil naziri Emin Əmrullayev aprelin 29-da Sumqayıtda Hacı Zeynalabdin qəsəbəsində yerləşən 19 nömrəli məktəbin idman zalında 7 yaşlı Fərid Bakarovun idman məşqçisi Mehman Xəlilov tərəfindən kobud davranış nəticəsində ölməsi ilə bağlı məsələyə münasibət bildirərkən deyib.
Nazir bildirib ki, Elm və Təhsil Nazirliyinin sistemində 60 mindən artıq şagird idmanla məşğul olur: “İnanırıq ki, hüquq-mühafizə orqanları tərəfindən məsələyə müvafiq hüquqi qiymət veriləcək. Eyni zamanda, dediyim kimi, bu hadisənin bütün idman sisteminə şamil edilməsi düzgün olmaz. İdman müəssisələrimiz, təhsil müəssisələrimiz, uşaq-gənclər idman məktəbləri öz fəaliyyətlərini davam etdirirlər. Orada onlarca beynəlxalq turnirlərin qalibləri çalışırlar və bu, uşaqların sağlamlığı üçün vacibdir”.
Nazir bildirib ki, qanunvericiliyə əsasən məşqçilərin fəaliyyətində lisenziya göstərmək tələb olunmur: “Biz də fəaliyyətimizi buna uyğun qururuq. Təbii ki, sabah belə bir tələb olarsa, biz də həmin şəxsləri işə götürəndə həmin tələblərə əməl edəcəyik.
Hazırda sözügedən şəxs ötən ilin axırlarında işə qəbul olunub və qanunvericiliyin tələbi prinsipcə pozulmayıb. Həm ali təhsilli məşqçi, beynəlxalq turnirlərin qalibi və idman ustası kimi tanınan şəxs olub. İdman zalı isə icarəyə verilməyib”.
Emin Əmrullayev qeyd edib ki, bir çox rayonlarda idmanla məşğul olmaq istəyən şagirdlərimizin sayı çox olduğuna görə, ayrı-ayrı məktəblərin zalları uşaq gənclər mərkəzlərinin məşqçilərinin istifadəsinə verilir: “Burada icarə, maliyyə qazancı məqsədi yoxdur. Sadəcə olaraq əhatəliliyi təmin etmək üçün bu prosedur icra edilir”.
Məktəbli olmayan, azyaşlı uşağın qeydiyyatdan kənar məşqə cəlb olunmasında məktəb rəhbərliyinin məsuliyyətinə gəlincə isə nazir bildirib ki, bu və ya digər baş vermiş hadisədə təqsirkarı müəyyənləşdirmək hüquq-mühafizə orqanlarının işidir.
“Bizim tərəfdən proses belə tənzimlənir ki, məşqçi tərəfdən uşaqlar jurnala əsasən məşqə cəlb olunmalıdır. Amma təəssüf ki, bu halda məşqçi tam qeydiyyatda olmayan uşağı da məşqə cəlb edib və bu hal daha əvvəl də baş verib. Burada məsuliyyət birbaşa onundur və qanun pozuntusuna yol verib. O ki qaldı, məktəb rəhbərliyinin cavabdehliyinə düşünürəm ki, bu, araşdırılmalıdır. Çünki zal dərs vaxtlarından kənar istifadəyə verilir. Hansı formatda verilməsinə proses zamanı yəqin ki, hüquqi qiymət verilə bilər. Bu hadisədən çıxarılan dərs ondan ibarətdir ki, həm məktəblər, həm valideynlər, həm məşqçilər, həm də federasiyalar bu işə daha diqqətlə yanaşmalıdırlar. Mənim şəxsi fikrim budur ki, bu, bir şəxsin cinayət ehtimalı olan davranışı ilə bağlıdır və burada sistematik problem görmürəm”, - deyə nazir fikrini yekunlaşdırıb.
Bölmənin digər xəbərləri
