Aprelin 10-da Azərbaycanın Baş naziri Artur Rasizadə Rusiya hökuməti sədrinin müavini Viktor Xristenkonu və onu müşayiət edən şəxsləri qəbul etmişdir.

Artur Rasizadə qonaqları səmimiyyətlə salamlayaraq bildirdi ki, Azərbaycan Respublikasının Prezidenti Heydər Əliyevin bu ilin yanvarında Rusiyaya dövlət səfəri zamanı çoxlu mühüm sənədlər imzalanmışdır və bunlar ikitərəfli münasibətlərin möhkəmləndirilməsinə kömək edir. O cümlədən, Bakıda aprelin 10-da hökumətlərarası komissiyanın iclasında imzalanmış “Azərbaycan Respublikası ilə Rusiya Federasiyası arasında 2010-cu ilə qədər uzunmüddətli iqtisadi əməkdaşlıq proqramının həyata keçirilməsi barədə tədbirlər planı”nın xüsusi əhəmiyyəti qeyd olundu. Ölkələrimizin hökumətləri bu sənədlərdə nəzərdə tutulan tədbirlərin vaxtında yerinə yetirilməsi üçün çalışmalıdırlar.

Baş nazir qeyd etdi ki, qarşılıqlı surətdə faydalı iqtisadi əməkdaşlıq artıq konkret nəticələr verir. Cari ilin birinci rübundən başlayaraq əmtəə dövriyyəsində nəzərəcarpan artım hiss olunur.

Viktor Xristenko bildirdi ki, hökumətlərarası komissiyanın Rusiya tərəfdən olan üzvləri Bakıya gəldikdən dərhal sonra işə başlamışlar. Komissiyanın iclasında əməli söhbət olmuş, gələcək əməkdaşlığın perspektivləri, o cümlədən humanitar sahədə əməkdaşlıq planı müzakirə edilmişdir.

Qəbulda kənd təsərrüfatı sahəsində əməkdaşlığın inkişaf etdirilməsi, həmçinin Azərbaycanın kənd təsərrüfatı məhsullarının Rusiyaya göndərilməsi və tərəfləri maraqlandıran digər məsələlərə də toxunuldu.