SİYASƏT
NAZİRLƏR KABİNETİNİN MƏTBUAT MƏRKƏZİNİN MƏLUMATI
Aprelin 11-də Azərbaycan Respublikasının baş naziri Artur Rasizadə İranın xarici işlər naziri Kamal Xərrazini və onu müşayiət edən şəxsləri qəbul etmişdir.
Baş nazir Artur Rasizadə qonağı səmimi salamlayaraq, yaxın qonşumuz olan İranla ölkəmizin qarşılıqlı münasibətlərinin daim yaxşılaşmasına və əlaqələrin genişləndirilməsinə böyük əhəmiyyət verdiyini bildirdi. İran-Azərbaycan ikitərəfli iqtisadi əməkdaşlıq komissiyasının son vaxtlar fəallaşdığını nəzərə çatdıran Baş nazir eyni zamanda xatırlatdı ki, hələ qarşıda görüləcək işlər çoxdur.
O qeyd etdi ki, ölkələrimiz arasında faydalı iqtisadi əməkdaşlığın inkişaf etdirilməsi üçün enerji sektorunda, nəqliyyat, ticarət, investisiya qoyuluşu, yeni istehsal sahələrinin yaradılması və digər istiqamətlərdə geniş imkanlar mövcuddur.
Azərbaycana bir daha gəlişindən məmnunluq duyduğunu bildirən Kamal Xərrazi, İranın ölkəmizlə daha sıx və hərtərəfli əlaqələr saxlanılmasına böyük əhəmiyyət verdiyini vurğuladı. O, ölkələrimiz arasında iqtisadi və mədəni əlaqələrin sıxlaşdırılmasına, yanacaq-energetika sektorunda birgə əməkdaşlığa və elmi-texniki mübadilələrin genişləndirilməsinə tərəfdar olduğunu bildirdi.
Görüş zamanı Xəzərin statusu və tərəfləri maraqlandıran digər məsələlər ətrafında da fikir mübadiləsi aparıldı.
Qəbulda Azərbaycanın İrandakı səfiri Abbasəli Həsənov və İranın Azərbaycandakı səfiri Əhəd Qəzayi iştirak edirdilər.
Bölmənin digər xəbərləri
