Neftçalada qısa müddətdə 20136 sakin müayinə olunmuşdur
Neftçala, 15 mart (AZƏRTAC). Prezident İlham Əliyevin tapşırığına uyğun olaraq, Neftçala rayonunda da əhalinin tibbi müayinəsi uğurla davam etməkdədir. Qısa müddətdə 83 minə yaxın sakinin 20136 nəfəri tibbi müayinədən keçmişdir.
AZƏRTAC xəbər verir ki, mərkəzi rayon xəstəxanasında sakinlərin hərtərəfli müayinəsi üçün bütün şərait yaradılmışdır. İlkin olaraq rayonun idarə, müəssisə, təhsil ocaqlarında və digər təşkilatlarda çalışanlar tibbi müayinəyə cəlb edilmişdir. Müayinələr yüksək ixtisaslı həkimlər tərəfindən aparılır, lazım gəldikdə ambulator və ya stasionar müalicələr təyin olunur.
Rayon icra hakimiyyəti başçısının müavini Gültəkin Sadıqova AZƏRTAC-a bildirmişdir ki, aksiyanın mütəşəkkilliyini təmin etmək məqsədilə xüsusi komissiya yaradılmışdır və operativ qərargah fəaliyyət göstərir. Bu günədək tibbi müayinədən keçmiş sakinlərin 140 nəfərində müxtəlif xəstəliklər aşkar olunmuşdur. Xəstələr ambulator və stasionar müalicəyə cəlb edilmiş, yerli şəraitdə müalicəsi mümkün olmayan 39 nəfər isə Bakı şəhərinə göndərilmişdir.
Rayon mərkəzi xəstəxanasının baş hakimi Telman Zahidov AZƏRTAC-a müsahibəsində demişdir ki, hazırda müayinələrin keçirildiyi bütün tibb müəssisələri gücləndirilmiş iş rejimində çalışır. Zərurət yarandıqda müayinələr evlərdə aparılır.
Bölmənin digər xəbərləri
